Torgeir filmmann påskjøna med pris
Filmmannen Torgeir Hegna (21) blei årets vinnar av ungdomsprisen i Bø.
BØ Prisen, som blei utdelt før kommunestyremøtet i går kveld, bar tidlegare namnet representasjonspris. Heideren kan delast ut til ungdom frå 16 - 25 år som har markert bygda positivt på nasjonalt nivå.
– Eg er veldig glad og overraska, seier Torgeir Hegna til Varden etter påskjøninga.
– Dette er eit positivt slag i trynet. Det er moro å bli sett pris på og ein inspirasjon til vidare arbeid. Drømmen er å bli filmmann på heiltid, seier 21åringen, som no arbeider både i bokhandel og barnehage.
Allsidig
Torgeir Hegna er både skodespelar, regissør og manusforfattar.
– Han starta amatørgruppa Heia Filmproduksjon i 2005 saman med Sondre Halstensgård og Kjell Christoffer Kirkevold. Dei laga kortfilmar som Gullfisken, Dickie Dick Dickens og ein spelefilm som enno ikkje er offentleggjort, opplyste Bø-ordføraren i samband med tildelinga.
Hegna fekk og gode kritikkar som revysjef på russerevyen «Herifrå te Nav» i 2010. Same året byrja han på filmmanuset til «Harde strenger» i lag med medstudent Magne Håheim på Romerike Folkehøgskole.
Suksess
Den filmen hadde premiere 25. februar i år.
– «Harde strenger» fekk heile 1.400 besøkande på Bø kino, og er no ute på DVD, fortalde ordførar Olav Kasland.
Torgeir Hegna driv i dag produksjonsselskapet Raven Film på fritida. Han har gjort suksess med Humbuckers musikkvideo til «The Way I am». Hegna planlegg no ein actionkomedie som får kinopremiere i 2014.