Her kjem ei ny badstove
STORHAUG: Neste år kan ei ny badstove i Strømvik på Storhaug stå ferdig. Viss pilotprosjektet går bra, kjem det òg badstover til Store Stokkavatn og Hafrsfjord.
Representant Kari Moe i Stavanger Badstuer AS er forsiktig optimistisk for oppstart til byggeprosjektet.
– Ting går nok ikkje alltid heilt på skjener i ein slik prosess, men vi håpar at badstova er ferdig i 2023.
Strømvik ligg i Godalen på Storhaug (sjå kart). Badstova skal vere permanent, at den står på land, og skal vere del av eit prøveprosjekt på to år.
Store Stokkavatn og Hafrsfjord står i kø
Stavanger Badstuer AS ønsker å vere med i eit pilotprosjekt for å bygge ei permanent badstove på Strømvik, like sør for Godalen vgs., som historisk sett har vore ein badeplass sidan 1914.
18. mai fekk forslaget politisk fleirtal i Utval for miljø og utbygging med fleirtal i stemmene frå H, V, MDG, Frp, Fp og Ap. Det neste trinnet for Stavanger Badstuer AS blir då å ordne ein leigeavtale hos kommunen, sende ein byggesøknad, og skaffe middel for å bygge badestova.
Etter prosjektperioden på to år, kan politikarane på nytt vurdere fleire flytande og permanente badstover. Då kan Store Stokkavatn og Hafrsfjord bli aktuelle for permanente og flytande badstover.
Kommunalt anlegg, eller?
– MDG ønsker seg fleire badstover i Stavanger. Dei er gode for folkehelsa, og gjer byen vår friskare, seier Håkon Fossmark (MDG) som sit i Utval for miljø og utbygging (UMU).
Fossmark peikar på at badstovene har blitt utruleg populaere, og håpar på at det kjem fleire til Stavanger.
Men: Anlegg som blir etablert i friområde, må vere opne for allmenn bruk, slik badstova i Strømvik skal vere. Med andre ord kan ikkje kommersielle anlegg stå her. Dette er Fossmark usamd i.
– Fordelen ved å ta inn kommersielle aktørar, er at det blir enklare å stille krav til standard og vedlikehald med meir profesjonell drift. Samtidig ønsker vi ein kombinasjon av kommersielle og ideelle aktørar.
Han viser til Oslo-modellen som har hatt ein prøveperiode på inntil tre år der ulike aktørar har fått realisere badstove-prosjekta deira, utan å betale leige i mellomtida.
– Det er ikkje viktig for oss kven som driftar badstovene, men at kommunen kan legge til rette for ulike aktørar som tek omsyn til naturområda, seier Fossmark.
Marknaden treng alternativ
Høgre-politikar Federico Juarez Perales er samd med Fossmark. Høgre ønsker heller ikkje å stenge dørene for kommersielle aktørar på kommunale areal i pilotprosjektet.
Badstovene skal kunne driftast med eit berekraftig fokus, men utan nemneverdige krav til infrastrukturen – slik dei gjorde i Oslo.
– Det er ingen garanti for at badstovene i Svankevika kan behalde plassen sin, og då treng dei alternativ. Det blir vanskeleg å finne plass for kommersielle aktørar viss drifta berre kan gjerast av ideelle og kommunale aktørar.