Havvind er framtida – landbasert vindkraft er på veg ut
ENERGI: Vindkraft skjemmer og trugar naturen i for stor grad. Fylkesdelplanen for vindkraft er 12 år gammal og må oppdaterast.
Alexander Rügert-Raustein
Tysdag 5. mars har Stavanger Turistforening eit arrangement på Mostun natursenter om naturøydeleggingar relatert til massiv utbygging av vindkraft på land. Det kjem tydeleg fram at Den Norske Turistforening (DNT) har den oppfatninga at dette går for langt, og at kostnaden med skjemt natur, trusselen mot dyrelivet og tapt rekreasjonsverdi er blitt altfor stor. Dette er Dei Grøne einige i.
Sørover i Europa blir vindmøller bygde der infrastrukturen allereie er på plass, dvs. i kulturlandskap. Det kan fortsatt tenkjast at dette vil vere aktuelt her til lands, men ikkje i urørt natur.
Vi har gått for langt
Dei Grøne Rogaland meiner at framtida til vindkraft ligg til havs. Med den rivande utviklinga som kan ventast der, og i lys av behovet for å ta vare på urørt natur, er truleg landbasert vindkraft på veg ut.
Allereie i 2016, da Fosen-utbygginga vart vedteken, sa Dei Grøne tydeleg at me har gått for langt når det gjeld utbygginga på land. Andre interesser, som samane si reindrift, uforstyrra natur og moglegheita til å oppleve den, er verdiar som ikkje målast i kroner, men er verde meir enn avkastninga frå disse prosjekt.
Dette er eit dilemma, for Dei Grøne kjemper for eit fossilfritt samfunn. Da er me også nøyde til å erstatte dei fossile energikjeldene med fornybare. Me har difor vore ein pådrivar for vindkraftprosjekt lenge, både på land og til havs.
Samstundes må me skape nye arbeidsplassar som erstattar dei som vil forsvinne i oljebransjen. Elektrifisering av bilparken vil krevje auka kraftproduksjon, og Avinor jobbar på spreng for å elektrifisere innlandsfly. I kraftbehovet dette generer ligg eit utviklingspotensial som ikkje blir brukt i tilstrekkeleg grad for å få gang på det grøne skiftet.
Oppdater fylkesdelplanen!
Me kravde allereie to år tilbake ei heilskapleg energimelding for unngå konflikt for kvar utbygging. Som vårt regionale bidrag vil dei Grøne i Rogaland rullere fylkesdelplanen for vindkraft fortast mogleg i perioden som kjem. Den er 12 år gammal og utdatert. Rogaland skal også etter det grøne skiftet vere landets fremste energiregion. Da er me nøydde til å handle rask.
Potensialet til havs er enormt. Det skal nyttast godt. Her må me bruke våre kompetansefortrinn innan offshore teknologiutvikling for å skaffe arbeidsplassar både nasjonalt og internasjonalt. Også Noreg sjølv vil ha behov for straum frå solceller og vindmøller for å dekke sitt behov.
Dei Grøne vil ta vare på naturen. Me er audmjuke overfor ny kunnskap. Landbasert vindkraftutbygging har gått for langt. Difor satsar me på vindkraft til havs.