Ein god pakke for Vestlandet
Sinneheld mykje godt nytt for Vestlandet. Det kjem tiltak innanfor alt frå reiseliv til frivillig sektor og sosiale ordningar.
FIRE AV DEI viktigaste endringane er svært etterlengta i vest:
Fire milliardar til landets kommunar og éin milliard til fylka er viktig i ei tid der lokalsamfunna har store ekstrakostnader og kan vente lågare skatteinngang. Viktigast er likevel lovnaden om at det kjem meir.
Stortinget er samde om fleire viktige avgiftssletter for industrien.
Det skal bli lettare for arbeidstakarar på dagpengar å studere eller ta skulefag.
Det kjem éin milliard kroner til utbetring og vedlikehald på offentleg infrastruktur for å hjelpe anleggsbransjen, altså utbetring av vegar, bane, hamner og rasutsette område.
I TILLEGG HAR stortingsfleirtalet samla seg om fleire tiltak som gjer det lettare med fleire grøne tiltak for industrien:
Regjeringa blir bedt om å kome med ein finansieringsplan for flytande havvind, pengar til nullutsleppsbåtar og eit vedtak om å skunde på prosjekt med karbonfangst og -lagring. I tillegg må regjeringa greie ut karbonfangst på tre nye avfallsanlegg, mellom anna i Bergen.
SAMLA SETT ER dette målretta tiltak som både gjev akutt hjelp til folk, kommunar og næringsliv, i tillegg til at fleire tiltak peikar vidare. For leverandørindustrien på Vestlandet er det viktig at det ventar oppdrag også framover.
No er det svært viktig at kommunane tek signalet frå Stortinget. Kommunane bør no ikkje kutte i innkjøp og rehabilitering av frykt for dårlegare økonomi, og dermed gjere vondt verre for næringslivet.
EI UTFORDRING MED tiltaka Stortinget har lagt til regjeringas tredje krisepakke, er at svært mange er mynta på ein fase vi framleis er eit stykke unna.
Kommunane bør no ikkje kutte i innkjøp og rehabilitering av frykt for dårlegare økonomi, og dermed gjere vondt verre for næringslivet.
Det viktige no er å redde næringslivet frå massekonkurs. Difor må den direkte støtta på 50 milliardar kroner kome først.
MEN SAMSTUNDES ER det viktig å sjå framover. Difor er det mykje bra i det Stortinget no har kome fram til.