Fekk grønt lys frå direktoratet
Fredag vedtok Fiskeridirektoratet at havmerdene til Nekst AS får tildelt utviklingskonsesjonar. – Dette kan utløyse investeringar på tre milliardar kroner, seier Martin Ramsdal i Nekst.
– Då har vi fått grønt lys! No startar dialogen om kor mange konsesjonar vi får, men dette er ein fantastisk mogelegheit for oss, og Sogn og Fjordane, seier Martin Ramsdal, ein av dei to partnarane i oppdrettsselskapet Nekst.
Selskapet meiner dei har funne løysinga på dagens utfordringar med lus og rømming i norske oppdrettsanlegg, og går alt etter planen skal dei byggje verdas største oppdrettsanlegg på land.
Der skal laksesmolten vekse til 2,7 kilo, før laksen vert sett ut i sjøen i Nekst sine «Havlilje»merdar. Det er desse merdane som no er blitt godkjende under utviklingskonsesjonane til direktoratet.
«Under sterk tvil»
Søknaden – på 16 utviklingsløyve på 12.480 tonn laks – blei sendt inn i oktober 2016. Fredag kom svaret:
«Ut fra de opplysningene som foreligger på det nåvaerende tidspunkt vurderer Fiskeridirektoratet under sterk tvil at det omsøkte konseptet faller innenfor ordningen med utviklingstillatelser,» står det i vedtaket. Vidare skriv direktoratet at dei tek sikte på tildeling av ein eller fleire utviklingstillatelser.
Ikkje grunnlag for 16
Per i dag er 31 søknadar blitt avslått av Fiskeridirektoratet, medan åtte prosjekt har fått tildelt til saman 53 løyver.
Direktoratet påpeikar at dei ikkje ser grunnlag for å tildele Nekst 16 konsesjonar. Dei understrekar også at dersom Nekst skal få ein eller fleire konsesjonar, må realiseringa av prosjektet vere i tråd med ordninga om utviklingstillatelsane.
– Vi har ikkje snakka med direktoratet enno, men sender etterspurde opplysningar kring finansieringa i løpet av neste veke, seier Ramsdal.
– Vi går sjølvsagt for 16 løyver. Det er det optimale dersom vi skal investere i eit såpass stort anlegg.
Han får støtte frå fylkesordførar i Sogn og Fjordane Jenny Følling:
– Fylkesutvalet ber om at Fiskeridirektoratet og Fiskeridepartementet medverkar til at det blir tildelt tilstrekkelege med utviklingskonsesjonar slik at prosjektet kan realiserast med full utbygging, seier ho.