Gávttehasat GILVALIT Kárášjogas
Sámi joatkkaskuvllas Kárášjogas atnet Sámi álbmotbeaivvi ávvubeaivin, ja nu sii lágidit árbevirolaš olgostohkosiid joatkkaskuvllas.
Beaivváš lea fas ihtán ja Sámi joatkkaskuvlla nuorat ja oahpaheaddjit Kárášjogas, leat čoahkkanan skuvlla šilljui lávlut Sámi soga lávlaga dan botta go levgejit sámi leavggain. Olusat, sihke nuorat ja bargit, leat čiŋadan otná beaivái.
Joatkkaskuvlla oahppi Anne Inger Birkely muitala su mielas lea hui somá go beassá čiŋadit ja čájehit sámevuođa. Otne lea son čiŋadan gávttiin, muđui son lea eanaš áigge meahcis.
– Otne mun lean čiŋadan gávttiin go lea dehálaš beaivi, muhto dan in leat dahkan juohke jagi. Daid maŋemus jagiid, de lean mun leamaš olu meahcis. Muhto mu mielas galggašii sámevuohta oidnot dávjjibut, iige dušše sámi albmotbeaivvi, vuoi čájeha gullevašvuođa, dadjá Birkely.
Árbevirolaš olgostohkosat
Birkely luohkká, ovttas eará luohkáin, lágidit olgostohkosiid. Joatkkaskuvllas leat árbevirolaš olgostohkosat juoga maid lágidit Sámi Álbmotbeaivvi. Nuorat, ja maiddái oahpaheaddjit, servet njorostallamii, tandemčuoigamii, čivččorgilvui ja luvdáhockey.
Ambulánsafága oahpaheaddji May Rita H. Hansen muitala Sámi álbmotbeaivi galgá leat ávvubeaivin, danin sis ii leat dábálaš skuvla.
– Go skuvla lágida dakkár olgostohkosiid, de lea ulbmilin ahte buohkat sáhttet searvat stohkosiidda ja dat galgá leat somá. Stohkosiin lea maid sámi perspektiiva. Dát stohkosat leat lágiduvvon máŋggaid jagiid, ja de leatge šaddan árbevierrun midjiide. Oahppit leat ieža háliidan Sámi álbmotbeaivvi ávvubeaivin, iige dábálaš skuvlabeaivin, ja danin mis leat ge dakkár stohkosat ja guoimmuheamit otná beaivvis, dadjá Hansen.
Sámi joatkkaskuvllas váldet bottu maŋŋel stohkosiid vuoi oahppit geat eai leat vuos čiŋadan, besset čiŋadit. Skuvla kantiinnas galgá leat guoimmuheapmi ovdal go guossohit sámi mállásiid.