Dál álget addit ja váldit

Dál leat buot jienat lohkkon ja gulahallamat leat álgán bellodagaid ja listtuid gaskkas mat dárbbašit dan dahkat. Vaikke muhtun sámi suohkaniin lea áibbas čielggas makkár bellodagat ožžot stivrejumi, de aŋkke ii leat dat čielggas buot sámi suohkaniin. Porsáŋggus orro oalle čielggas, ahte Bargiidbellodat joatká stivrejumi ovttas Guovddášbellodagain ja Sosiálisttalaš Gurutbellodagain. Galgá ge oalle dramatihkalaš dilli doppe čuožžilit jus dat ovttasbargu ii menestuva.

Kárášjogas orro maid oalle čielggas ahte Bargiidbellodat joatká stivrejumi, muhto doppe leat ain vejolašvuođat. Dan diehtit ahte Johttisámiid Listtu, mas dán ge háve lea okta áirras gielddastivrras, lea válgagiččus dadjan áibbas čielgasit ahte sii sáhttet vaikke geainna ovttasbargat. Liikká lea oalle lunddolaš ahte sii jotket ovttasbarggu Bargiidbellodagain, Olgeš Bellodagain ja Sámeálbmot Bellodagain. Lea ge dan láhkai ahte Sámeálbmot Bellodat oažžu dán áigodagas maiddái várresátnejođiheaddji saji, go sii han dahke oalle buori válgga. Sii bohte sisa guvttiin áirasiin, mii lea ge beali stuorát joavku go mannán áigodagas. Dalle dieđus lea lunddolaš ahte Bargiidbellodat ja earát addet dan saji vuot

John Nystadii.

Guovdageainnus lea veahá váddáseabbo kabála, go Dáloniid Listui orro oalle váttis oažžut eanetlogu. Vaikke sii dahket erenoamáš buori válgga ja lasihit ovttain áirasiin iežaset dálá suohkanstivrra joavkku, de aŋkke orro oalle hástaleaddji oažžut eanetlogu. Muhto dás ii leat maŋemus sátni liikká daddjon, go Dáloniid Listtu dieđus sáhttá ovttasbargat máŋggain listtuin. Ii ge dáidde daddjon ahte Bargiidbellodat joatká ovttasbarggu Johttisápmelaččaid Listtuin. Bargiidbellodat dagai ge erenoamáš heajos válgga Guovdageainnus, go rivde stuorámus bellodagas measta unnimus bellodahkan, mii soaitá dahkat álkibun lávket Dáloniid Listtu beallái.

Deanus lea erenoamáš gelddolaš. Doppe lea dán háve gártan Deanu Sámelisttu nu gohčoduvvon «jokerin», go sihke Bargiidbellodat ja Guovddášbellodat ferteba sis oažžut veahki jus galget beassat eanetlohkui. Muhto Deanu Sámelistu ii vuovdde iežaset hálbái, go lea juo levgen makkár áššiid šaddet njiellat jus sis háliidit doarjaga. Das lea ge sáhka vuoruhit sámegiela ovdáneami, vuosttaldit bieggamilluid Rástegáisái ja biehttalit Elkem viiddideami. Erenoamážit daid guokte maŋemus gáibádusaid šaddá váttis njiellat. Bargiidbellodat lea leamaš hui mielas addit lobi cegget bieggamilluid Rástegáisái, nu ahte dan álgit vuosttaldit šaddá váttis sidjiide.

Vaikke muhtun sámi suohkaniin lea áibbas čielggas makkár bellodagat ožžot stivrejumi, de liikká lea dat eahpečielggas muhttin sámi suohkaniin.