Poastalága rievdadanevttohusaid dárbu guorahallat eambbo
Ráđđehus lea evttohan rievdadit poastalága, nu ahte Poasta suoidnemánu 1. beaivvi 2020 rájes dušše juohká poastta 2,5 beaivvi vahkkus, iige vihtta, nu go dál. Dakkár rievdadeamis leat eahpitkeahttá stuora váikkuhusat earret eará aviissaide mat galggaše beaivválaččat oažžut aviissa lohkkiidasaset. Ráđđehus áigu bidjat johtui buhtadeaddji doaimmaid golmma jagi badjel man mielde sihkkarastet aviisajuohkima. Iešalddis leat dat buorre doaibma, muhto dađi bahábut lea golbma jahki beare oanehis áigi.
Sihke Mediebedriftenes Landsforbund (MBL), Landslaget for lokalaviser (LLA) ja Sámi lágádusja aviisasearvi (Sálas) leat kritihkalaččat láhkarievdadanevttohussii. Dat bođii čielgasit ovdan Stuoradikki bearaš- ja kulturlávdegotti rabas gulaskuddamis láhkarievdadusevttohusaid birra. MBL fuomášuhtii makkár roasu láhkarievdadusa sáhttá buktit sihke báikkálaš, regionála ja našunála mediaviesuide. MBL loguid mielde čuohcá láhkarievdadus 75 000 aviisaabonnentii ja 200 000 aviisalohkkái geat eai šat, jus láhkarievdadus mearriduvvo, oaččo aviissa beaivválaččat, nu go dál dahket.
… jus Poasta heaitá beaivválaččat juohkimis poastta, de čuohcá dat garrasit sámi guovlluide
Mediadieđáhusas, man ráđđehus almmuhii cuoŋománu dán jagi, lea okta mihtuin bargat dan ala ahte eai galgga leat guovllut mat gártet «mediasuoivvanassii».
MBL fuomášuhttá ge ahte láhkarievdadanevttohusain dagahit easkka vel eambbo guovlluid «mediasuoivvanassii».
Einnosteaddji ja doaibmi aviisajuohkin lea dehálaš eaktun aviissaide, ja nu maid sámi aviissaide. Sihke Ávviris ja Ságat aviissas leat ain olu badjel bealli báberaviisadiŋgojeaddjit. Vaikko lohkkit geat válljejit digitála aviissa lassánit ja sáhttá maid vuordit ahte dat čuovvovaš jagiid lassánit vel eambbo, de lea báberaviisa ain boahtteáiggis dehálaš. Sálas ballá ge ahte jus Poasta heaitá beaivválaččat juohkimis poastta, de čuohcá dat garrasit sámi guovlluide, gos leat stuora gaskkat ja olbmot orrot bieđgguid. Lea maid dovddus ášši ahte ii boaittubealbáikkiin leat vel interneahttafálaldat dan mađe buorre ja jođán ahte lea vejolaš váldit atnui ja beaktilit geavahit digitála reaidduid ja fálaldagaid.
Jus Stuoradiggi mearrida daid rievdadusaid maid leat evttohan, de das sáhttet leat stuora váikkuhusat sámi mediamáŋggabealatvuhtii. Danne sávvat ahte čađahuvvojit vuđolaš guorahallamat makkár váikkuhusat láhkarievdadeamis leat, makkár buhtadeaddjidoaimmaide lea dárbu ja mun guhkes áigái lea dárbu buhtadeaddjidoaimmaide.