– Ojá, dájuhangažaldat bat leige!
1. Man boaris lea bláđđi Nuorttanáste? – In dan gal dieđe. In duostta árvidit ge! Rievttes vástádus: 120 jagi.
2. Goas jorggiha beaivi fas seavdnjada guvlui? – Lea go skábmamánus? A-a, árvidan geassemánu 20. beaivvi.
Rievttes vástádus: Geassemánu 21. beaivvi.
3. Mii lea Norgga guhkimus johka?
– Dás gal lei measta miella lohkat Deatnu. He-he, na in mun dan dihte dieđe.
Rievttes vástádus: Glomma.
May Kristine ii vástidan riekta buot golbma vuosttaš gažaldaga, ii ge mannan viidáseappot liigegažaldagaide. Son beassá aŋkke geahččalit vástidit ovtta árvádusa mainna sáhttá oažžut 5, 10 dahje 15 čuoggá. Rukses árvádus lea váddáseamos, ja jus dan vástida riekta de oažžu 15 čuoggá. Alit árvádusain oažžu 10 čuoggá ja ruoná árvádusain ges 5 čuoggá.
May Kristine vállje alit árvádusa.
Muhtun mánuid leat 30 beaivvi, eará mánuid fas 31 beaivvi. Galle mánu leat 28 beaivvi?
– Na ii bat leat eará okta mánnu mas leat
28 beaivvi?
Rievttes vástádus: 12.
– Ha-ha! Ojá, dájuhangažaldat! In dien gal oba jurddašange! boagusta May Kristine.
Galle čuoggá oktiibuot: 0
Juohke gilvaleaddji beassá hástalit ođđa gilvaleaddji Ávvira geassegilvui.
– Na de oažžubehtet sáddet dán gilvvu gitta Troandimii. Mun hástalan iežan oambeali, Tine Balto.