– OBA UNOHAS DOVDU
Viessu «bahuid nuoskkiduvvon» eatnamis leamaš lahka 50 jagi:
Birasdirektoráhtta lea su eatnama merken ruoksadin, mii mearkkaša ahte dat lea «bahuid nuoskkiduvvon ja doaimmat fertejit biddjot johtui». Viessoeaiggáda mielas lea unohas dan gullat, go ii diehtán maide dan birra vaikke viessu lea huksejuvvon 1970-logus juo.
Birasdirektoráhta lea su eatnama merken ruoksadin, mii mearkkaša ahte dat lea «bahuid nuoskkiduvvon ja doaimmat fertejit biddjot johtui». Ieš son ii dieđe ii maidege dan birra.
Birasdirektoráhta lea gieskat almmuhan interaktiiva kártta nuoskidemiid birra. Das sáhttá juohkehaš mannat geahččat lea go su eana nuoskkiduvvon juoga man nu ládje, dahje lea go lahka su viesu dakkár báiki mii lea nuoskkiduvvon, dahje lea go su eana njuolggusin leamaš ovddeš doapparbáiki.
Unohas
Sirbmálaš, Elen Ragna G. Knutsen eana Sirpmás lea dakkár eana maid Birasdirektoráhta lea gohčodan «bahuid nuoskkiduvvon ja doaimmat fertejit biddjot johtui». Muhto Knutsen gal ii dieđe ieš dan birra ii maidege.
– Mun in leat gullan ge dien birra ahte mu eana galgá leat nuoskkiduvvon, lohká son go Ávvir riŋge sutnje.
Aitto oastán
Knutsen muitala ahte soai han leaba aitto oastán dan eatnama Fefo:s, maid soai ovdal leaba láigohan.
– Aitto ostiime eatnama iežame háldui, eai ge Fefo bealis leat dieđihan maidege ahte lea nuoskkiduvvon eana, lohká son.
– Maid logat, ahte lea liikka olu nuoskkiduvvon go doapparbáiki? na diet gal buvttii oba unohis dovddu, lohká son.
– Leat go mearkkašan moktege ahte lea nuoskkiduvvon du eana?
– Dan gal in leat, vástida son.
Vearrámus kategoriija
Birasdirektoráhta lea nuoskkiduvvonbáikkiid kategoriseren njeallje sadjái. Fioleahtta ivdni kárttas muitala ahte várohit lea nuoskkiduvvon. Ruonáivdni muitala fas ahte ii leat nuoskkiduvvon, dahje hui unnán nuoskkiduvvon. Fiskat muitala fas ahte lea unnán dahje dohkálaš nuoskkideapmi areála ja lea geavahannjuolggadusaid mielde. Fiskadii lea ovdamearka Njávdán doapparbáiki, dahje Biedjovákki ruvke. Ruoksat kárttas mearkkaša fas ahte lea bahuid nuoskkiduvvon, ja lea dárbu ahte doaimmat biddjojit johtui. Knutsena eatnamis lea juste dakkár rukses mearka. Ávvir leat geahččan, ja doppe leat eambbo eatnamat gosa leat viesut huksejuvvon, mat leat merkejuvvon ruoksadin.
Juohkit dieđuid
Birasdirektoráhta senioraráđđeaddi, Per Erik Johansen, muitala ahte sii leat dán kártta ráhkadan vai juohkehaččas galgá vejolašvuohta mannat geahččat makkár eatnama alde orru ja maiddái makkár biras lea gos orru.
– Mii háliidit juohkit álbmogii dieđuid mat mis leat, dat lea ulbmil dainna kárttain, muitala son.
Fylkkamánne dieđut
Kárttas maid boahtá ovdan ahte leat fylkkamánnit Norggas geat leat ovddasvástideaddjieiseválddit. Dan duođašta Birasdirektoráhta senioraráđđeaddi, Per Erik Johansen, ja dakko bokte maid biehttala ahte ii leat sin ovddasvástádus.
– Juo dat lea fylkkamánniid bargu, dieđuid buktit maid mii de bidjat kártii, muitala son Ávvirii.
Johansen ii loga sáhttit dadjat duođi eambbo ášši birra ja ávžžuha váldit oktavuođa fylkkamánnin.
– Áiggun diehtit mii lea
Viessoeaiggát Elen Ragna G. Knutsen lohká ahte son gal háliida diehtit mii su eatnamis lea, go nie lea ivdnejuvvon ja lohket lea bahuid nuoskkiduvvon.
– Mun gal ferten suohkanin hupmat dien birra. Gal oba ártet lea gal maid go moai ostiime dan eatnama, ii ge doppe boahtán ovdan ahte lea nuoskiduvvon. Ja dalle go huksiime, 1970-logus, ii dalle ge leat boahtán ovdan dákkár dieđut, lohká son.
– Ammahal dál goit árvu gáhččá mu eatnamis, ii dan šat jođit gosa ge jus vuovdit áigo, lohká son vel loahpas ja šuohkiha.