– Dilli lea dál čuvggodišgoahtán
Nussir-direktevra:
Nussir-direktevra Øystein Rushfeldt lei čuovvume Fálesnuori suohkanstivračoahkkima mii lei duorastaga. Doppe son lei čuovvume ášši mas suohkanstivrras lei Nussir-ášši gulaskuddamis. Son lohká doppe mannan bures, ja go Fefo-direktevra dál lea cealkán ahte son lea positiiva Nussirii, de dat buktá Nussir-direktevrii buori dovddu.
Fefo oaivil hui dehálaš
Nussir-direktevra illuda Fefodirektevrra doarjaga ovddas ja lohká dehálažžan sidjiide maid Fefo oaivvilda áššis.
– Mii illudit buot doarjaga ovddas maid oažžut, ja earenoamážit vel Fefos, mii lea okta dain dehálepmosiin, go sii eaiggáduššet dan eatnama gos mii galggašeimmet álggahit ruvkke. Sidjiide maid boahtá stuora oassi prošeavtta sisaboađus go dat boahtá johtui ja mis galgá singuin lagas oktavuohta logiid jagiid ovddos guvlui, nu ahte midjiide lea hui dehálaš maid Fefo oaivvilda, lohká Rushfeldt.
Oaidná loahpa doaibmalobi áššis
Dál ovddos guvlui sávvá Rushfeldt ahte proseassa manná jođánit, vai besset álgit Nussir ASA ruvkke ásahemiin. Son lohká sii dili dál čuvggodišgoahtán ja lea positiiva ášši ovdáneapmái.
– Mii sávvat ahte manná jođánit dás ovddas, mii lea dehálaš midjiide. In jáhke šat ahte doaibmalobi ášši šat joatká nu guhká, nu ahte dál mii oaidnit loahpa dain proseassain mat gusket lobiide. Lea maiddái buorre go veaikehaddi loktana. Mii leat positiivvat go doarjaga oažžut, lohká son.
Fas digaštallat váidudeaddji doaimmaid
Fefo mearrádusárvalusas lea eaktun doaibmalohpái ahte doaibma- biddji ovttas boazoealáhusain gávnnahit duhtadeaddji, buhtadeaddji doaimmaid. Nussir lea ovttas guovllu boazoealáhusain geahččalan ovdal dákkár šiehtadusa oažžut sadjái ja dán rádjái ii leat boahtán čoavddus. Son sávvá ahte boahtá rievdadus vai šiehtadus boađášii sadjái.
– Mis lea leamaš gulahallan goappašat orohagaiguin máŋga jagi juo, muhto eat leat vel oktasaš čovdosa soahpan. Fiettar orohat lea čielgasit dadjan ahte eai hálit makkárge šiehtadusa vuolláičállit dál, muhto mii sávvat ahte dat rievdá ja ahte mii gávdnat oktasaš čovdosa, lohká son.
Rabas gulahallat orohagaiguin
Rushfeldt lohká sávvat ahte sii sáhttet ieža deaivvadit ja humadit ášši birra ja lohká sin rahpasat boazoealáhusain gulahallat.
– Mii leat rahpasat digaštallat boazodoaluin, nu go álo. Mii háliidit gávdnat oktasaš čovdosa, áinnas dákkár vugiin ahte mii ieža deaivvadit humadit, eat ge dárbbat riekteapparáhta geavahit dasa mii mearrida min ovddas. – Fiettar orohaga jođiheaddji lea čielgasit lohkan ahte doaimmat, mat bohtet ovdan mearrádusárvalusas, leat dohkketmeahttumat. Son lohká sii dárbbašit areálaid ja guohtuneatnamiid. Sáhttibehtet go daid lohpidit sidjiide?
– Eat mii áiggo makkárge areálaid váldit sis, nu ahte rievtti mielde eai masse sii earenoamáš olu areálaid go mii álggahit ruvkke. Areálat maid mii áigut geavahit leat ovdalaččat juo regulerejuvvon industriijageavaheapmái máŋggaid logiid jagiid áigi, lohká Øystein Rushfeldt.
Gávnnus ovdamunnin prošektii
Nussir ASA:S leat maŋemus roggamis leamaš stuora gávdnosat. Rushfeldt jáhkká dát sáhttá nanusmahttit sin doaibmalobi ohcanášši.
– Go gávdnat dakkár stuora gávdnosa, de dat lea stuora ovdamunnin min prošektii. Dat buorida earret eará prošeavtta ekonomiija juohke háve, lohká son.