– Gielda HEAHTEDILIS
Ohcejoga ságadoalli Ilmari Tapiola lohká sin gártan heahtedillái ja lea roassu gildii maŋŋá go ođđa Deanosoahpamuš bođii fápmui.
Ohcejoga ságadoalli Ilmari Tapiola lohká ilbman stuorra rievdadusaid gildii ja gieldda ássiide maŋŋá go ođđa Deanosoahpamuš bođii fápmui ja leat gártan heahtedillái go soahpamuš lea addán stuorra váikkuhusaid olles gildii.
– Lea olu mii lea rievdan, turisttat leat geahppánan sullii 50 proseanttain ja muhtumis lea 70 proseantta ja muhtimis veahá unnit, muhto gaskamearálaččat lea bealli jávkan. Dat váikkuha juohke láhkai gildii, olbmuin ii leat šat tienas masa leat hárjánan dán rádjái ja dat maiddái váikkuha gieldda ekonomiijii. Vuođđoboahtu geahppána ja olbmot geahppánit daid gávppiin ja juohke bálvalusas geahppánit olbmot. Dat lea viehka stuorra váikkuhus Ohcejoga gildii, dadjá Ohcejoga ságadoalli Ilmari Tapiola.
Ministtar Ohcejohkii
Gaskamuttus boahtte mánu boahtá Suoma eanadoallo- ja meahcceminister Ohcejohkii go Ohcejoga gielda lea bovden su boahtit heahtečoahkkimii.
– Mii gieldda bealis leat bargan ahte galget álgit dalánaga ráđđádallat ođđa soahpamuša ja ahte de livččii ođđa soahpamuš moatti jagi geahčen fámus eat ge dárbbaš dákkár dilis šat eallit, dadjá Tapiola.
– Gártan heahtedillái
Gielda lea viggan vuosttaldit dán soahpamuša ja gielddas leat sii máŋgii fitnan Helssegis, muhto ságadoalli oaivvilda ahte Riikabeaivvi áirasat eai leat beroštan eai ge ádden dán ášši, ja dál sii leat gártan heahtedillái.
– Olbmuin lea heahtedilli dáppe go tienas lea geahppánan ja dáppe leat leamaš olu olbmot geat leat huksen geassebarttaid ja oastán fatnasiid. Dál leat fatnasat dušše joavdelassan doppe gáttis. Dáppe lea masá juohke dálus Deanuleagis turisten oasáš sin dálus, nu ahte dat ii váikkut dušše stuorra fitnodagaide, muhto juohke dállui Deatnogáttis ja daidda lea geahppánan tienas dán geasi, dadjá Tapiola.
– Hohpohalle
Son muitala Suoma bealde eai lean gergosat teknihkalaččat go soahpamuš bođii fápmui, ja go álge bivdolobiid vuovdit neahta bokte, de gopmánii olles fierpmádat ja dagahii moivvi sihke stággobivdiide ja fierbmebivdiide.
– Dáinna soahpamušain ii lean mihkkige hoahpuid ja livčče hui bures geargan boahtte jahkái válmmaštit soahpamuša albma láhkái, dadjá son.
Fatnasat gáttis
Ođđa soahpamuša bokte leat bartaoamasteaddjit fidnen suhkanlobi ja besset dál maiddái oamastit ja registreret iežaset nammii.
– Dat maiddái váikkuha fitnodagaide go bartaeaiggádat eai dárbbaš šat láigohit fatnasiid. Go vuodjá dál Deatnogátti, de oaidná olu fatnasiid dearpmis ja gáttis maidda ii leat šat atnu go ii leat šat oktage gii láigoha daid, lohká son.
– Vai sáhttit orrut dás
Ságadoalli lohká sin gieldda bealis dieđihit ministarii go boahtá galledit boahtte mánus ja son dáhttu ohcejohkalaččaid boahtit dieđihit makkár dilis sii leat dál.
– Dáppe ii leat dearvvas dilli, dál ferte johtilit joga rievdadusaid bargat ahte dáppe fas olbmot sáhttet orrut, ásahit ja birget. Orru nu ahte láttánat eai beroš sápmelačča vuoigatvuođain ja dorjot baicce láttániid vuoigatvuođaid, loahpaha Ohcejoga ságadoalli Ilmari Tapiola.