Thorvald Kristian Tande

Seniorredaktør Thorvald Kristian Tande døydde

29. desember, 94 år gammal. Han vart fødd på Nordre Bjørnsund. Faren dreiv fiskemottak, landhandel og postkontor. Etter artium i Molde i 1945 studerte han sosialøkonomi ved Universitetet i Oslo.

Livsverket til Thorvald er bladet Norsk Fiskerinæring. Kvar månad i snart 60 år har dette aktuelle og innsiktsfulle magasinet kome ut.

«Alle» i næringa les det. Det gjer og forskarar, leverandørar, byråkratar og politikarar. Thorvald var gift med Bergliot Lundgaard. Dei fekk fire born. Med Thorvald jr. i spissen driv dei nå Norsk fiskerinæring som ei vellukka familieverksemd.

Thorvald var oppteken av fiskerinæringa og var heile livet knytt til den. Først i klippfisknæringa sin eksportorganisasjon, DNKL, i Kristiansund. Gjennom Fiskeriøkonomisk Opplysningskontor vart han i to tiår frå 1950-åra krumtapp i eksportorganisasjonane sin fiskeripolitiske kamp for å hindre ei frykta sentralisering av eksporten. I 1957 gav han ut boka Norsk Fiskeripolitikk – en analyse av utviklingen siden 1920.

Thorvald stod ofte i striden. Han var ikkje redd for å kjempe for sitt syn. Det kunne vere klart og sterkt, både ovanfor havforskarar, byråkratar og politikarar. Han ville ha ei lønsam næring av både store og små deltakarar langs heile kysten. Trass ulike syn fekk Thorvald mange vener. Dette vart ikkje minst synleg då han på Landsmøtet i Norges fiskarlag fekk lagets Kystkulturpris 2013.

Thorvald likte å kople folk saman for å få fart i mange saker, nokre gonger med diskresjon og mange gonger gjennom store årlege fiskerikonferansar. Mange vil med stor glede hugse konferansane på Holmenkollen Park Hotel eller hyggelege samkomer på Solbakken i Eidsvoll, heimen til Thorvald og fru Bergliot.