OvakwaSheekuli va vatela oMandume Primary…
Ashike ofikola onghee tai pumbwa omakwafo natango
ONGWEDIVA - Nonande Ofikola yedina Mandume Primary momukunda Okatope moshitukulwa shaHangwena ya mona ekwafo kofamili yaSheekuli konima eshi va mona eyambidido letungululo leengulu dofikola, natango oya pumbwa evatelo. Ofikola oya li i na eengulu da kulupa neenghono, omo dimwe domudo da li di na omamanya a nuka mo taa dulu okutwa ovalongi nounona ndele tava mono oiponga. Omalupanda eengulu dofikola okwa kunghuka, nohaa etele ounona eshikisha notaa dulu yoo okueta omikifi dihapu tadi dilile mondwi. Omukulunhufikola woMandume Primary Anna Shihepo, okwa yandja olupandu laye kovakwanedimo vaSheekuli molwoilonga ya fimana ei va longela ofikola yavo. “Katwa li twa teelela tu ningilwe oilonga ya fimana ya fa apa,” Shihepo ta tumbula. Okwa weda po yoo kutya ota indile ovakwashiwana aveshe ava tava dulu mokuyambidida meemhumbwe dofikola yavo, ve va vatele. Shihepo okwa weda po yoo kutya natango ove na ovanafikola ovo vehe na omidjalo dofikola da wana po, omo vamwe vomuvo nokuli have ya eemhadi kombada shaashi kape na eenghaku. Ofikola natango oya pumbwa yoo evatelo loundjuwo, molwaashi oundjuwo vokulivatela ova mona oixuna. Ovalongi vopofikola navo kave na ombelewa omo hava kala, osho sha etifa vahapu va kale meengulu davo efimbo alishe. Jonas Eliphas oo e li omulongifikola poMandume okwa tumbula kutya molwaashi ofikola kai na ombelewa yovahongi, ohava ningile ashike oyoongalele yavo meengulu dofikola, voo ounona tava kala va teelela pondje manga ovahongi tava mane eenghundafana davo. Ofikola natango oi na eemhumbwe doipundi osho sha etifa opo ofikola i tume ovanafikola oipundi komaumbo. Ashike nande ongaho ofikola oi na po ngoo oshikunino shishona, omo hamu di oingumutulu noikwambidi yokulandifa. Oimaliwa ei ya dja moilandifomwa ohai lande ouyaxa vokulila ounona etete, yoo imwe tai lande oikuni yokutelekifa etete. “Ngeenge ounona ovo ova kala inava lya etete fiku olo ovadjuu okukondolola,” Eliphas ta tumbula.