Nakayale Vocational Training Centre ya tameka okulonga pamalungula
ONGWEDIVA - Oshiputudilo shoungoba shaNakayale modoolopa yaOutapi moshitukulwa shaMusati osha ninga omhangela opo shi ete po ediladilo lokutula oilongwa imwe oyo hai longwa moshiputudilo i kale hai longwa pamalungula.
Oshiputudilo shoovene osha yeululwa muAguste 2011 omo mwa li mu na ovananfikola ve li 40 novahongi vatano. Pefimbo olo tuu eli moshiputudilo okwa li ashike hamu lilongelwa omaifano e li atatu a yooloka.
Umwe womovanambelewa Sonia Shitaleni okwa kundaneka kutya ediladilo lokulonga ovanafikola pamalungula ove litameka nale omanga omukifi wocorona inau tameka. Okwa weda po yoo kutya corona eshi e ke ya a pimbila, opo nee edilaadilo ve ke litula moilonga unene tuu eshi va mona kutya ovanafikola itava dulu vali okufika peefikola davo vaholoke peetundi. Elongo eli lopamalungulula oli na ovanafikola va fika po80 paife. Moshivike ove na omwaalu wovanafikola va fika po296 hava shange omadeulo avo pamalungula.
Shitaleni okwa tumbula kutya elongo lopamalungula otali ende nawa lela novanafikola vahapu otava ulike ve na ohokwe nehalo shaashi ohava holoka momwaalu uhapu. “Natango otali ningi oilonga ipu unene tuu kovanafikola oshoyo ovahongi,” Shitaleni ta weda po.
Omulandu u li ngaha paife owa ninga oilonga yovanafikola ipu shi dulife nale eshi have ya okuninga keshe tuu osho sha pamba oilonga yofikola pofikola pwoovene.
Okwa kundanekwa yoo kutya paife ovanafikola ohava holoka ashike pofikola ngee teve ya okushanga omakonakono ponhele yokuholoka keshe efiku.
Oshiputudilo natango oshi li sha taalelaomashongo,ngaashiovanafikola vamwe ihava dulu okuwanifa po eetundi dokomalungula molwaashi kave na oikwafifo ya wana okuholoka meetundi. Vahapu okwa kundanekwa yoo kutya kave na oimaliwa yokulanda eedata dokulongifa omalungula.
“Vamwe kavebna eengodi dopashinena oshoyo eekompiuta,” Shitaleni ta tumbula. Ovanafikola vakwao ohava ende oinano ile tava kongo apa tava dulu okumona ekwafo va dule okulonga oilonga yofikola.