Aakuluntu ya kumagidhwa ya sile aanona oshimpwiyu
Opolisi moshitopolwa shaMusati onkene tayi tsikile okulopotelwa omakwato koonkondo, nuunene otaga ningilwa aanona aashona.
Omugandji gomauyelele gwopolisi moshitopolwa shaMusati no Anna Kunga okwa ti iiningwanima mbyoka onkene tayi indjipala moshitopolwa shawo
“Ota tu kumagidha aakuluntu taya yi kiituthi ya yooloka pethimbo ndika kaaya thige aanona aashona momagumbo naantu inaaya inekela nawa,” ta ti ngaaka.
Ta ti, omakwato koonkondo, ohaga ningwa kaantu ye shiwike oshowo kaaniilonga yomomagumbo oshowo aapambele.
Ta gwedhapo ta ti, ndika ethimbo aantu mboka haya longo iilonga mbyoka haya kala ya manguluka okulonga iilonga mbyoka oshoka oyeshi kutya aakuluntu itaya galuka mbala.
“Ota tu kumagidha lela, opo aanona ya kale taya thigwa miikaha yaantu ya ine kelwa okuyanda uupyakandhi mboka,” ta ti ngaaka.
Kunga okwati ohasho kala oshindhigu aanona mboka ya thikile taya popi shoka ya ningilwa oshoka oya mbandamekwa.
Ta ti, olundji aakuluntu ohaya ka ndhimbulula omayihumbato gaanona pwa pita ethimbo.
“Okuyanda ayihe mbyoka, naya landule omalombwelo nomakugidho yopolisi,” ta kumagidha ngaaka
Ta ti, oya taalela ethimbo lyomvula ndyoka hali faalele oomwenyo dho yendji, nuunene aanona ihaya kala metonatelo lyaakuluntu.
Kunga okwa gwedha po ta ti aakuluntu naya kumagidhe aanona, kwaashoka ye na oku iyanda kusho, nokukala taya zi kosikola ya ukilila komagumbo, uuna osikola ya tameke.
“Aakuluntu naya kale ye na oshisho uuna aalongwa inaaya thika komagumbo kuyele, konima yosikola ya pita mo, opo ya kale ye shi mpoka pe na aanona yawo,” ta ti ngaaka.
Ta ti, omvula oyili poku tameka okuloka onkene iishana otayi kala ya udha omeya.
“Longeni aanona kutya omeya ihaga dhanwa oga nika oshiponga,” ta popi ngaaka.
Kunga okwa ti otaya kumagidha wo natango aakuluntu mboka haya zi koondingosho ye li kohi yiikolitha pethimbo lyomeya haga kala ga talama miishana, opo ya ende nuukeka.