Va fyuulula nokufiya vati omufiyekadi nounona 12 pomutenya
Omukainhu weedula 56 omukalimo mOutapi pamwe noludalo laye vati ova fiwa
pomutenya kovamwaina vomushamane waye eshi va fyuulula po omaliko ayeshe mwa kwatelwa neumbo.
Celina Shuuveni, omufiyekadi womunangeshefa nakufya Erasmus
Shuuveni okwa hokolola ta ti oku li moluhepo osho nokuli sha etifa opo ounona vaye vamwe va dje mo mofikola. Ta ti onghalo oya djuupala neenghono nomeva omeumbo lomodoolopa omo ve li okwa tetwa ko.
Ta ti oimaliwa aishe ya li ya fiwa komavalulilo ombaanga po komusamane waye oya kufwa ko kovakwapata vomushamane.
“Omushamane wange okwa li e na ongeshefa, eetuwa noshoyo omaumbo limwe okomukunda nalikwao omodoolopa mOutapi.
Okwa li yoo e na eetuwa odo adishe da fyuululwa po kovamwaina vaye,” ta hokolola.
Ta ti oosuwala shaye nande va fyuulula po omaliko aeshe, onghee tava twikile nomahepeko, tave mu tukaele vati oye a lya po omushamane waye.
Erasmus okwa xulifa mo2015 nokwa fiya po ounona 12. Ounona vaheyali ova dalwa kuCeline omanga vatano va dalwa kovakainhu vamwe ve lili. Okwa hokolola ta ti okwa kengelewa kofamili yomushamane waye eshi ya ka ninga odjapo yefyo yoipupulu nokufufya koveta kutya Eramus ka li a hombola. “Okudja opo ova ya keembaanga ndele tava kufa ko oshimaliwa ashishe noku litopolela eetuwa,” ta hokolola.
Celine ta ti okwa mana ko eembelewa ta kongo omakwafo ashike ina mona.
“Onda shivifila ombelewa yelelo laMbalantu, onda ninga onghendabala yokufuta hahende, onda ya keemhangu da yooloka opo va popile nge ashike ina ndi mona ekwafo,” ta ti.
“Eumbo letu lomodoolopa kamu na sha vali omeva shaashi okwa tetwa ko kumuni eshi tu na eendjo domeva di li konima,” Mirjam Shuuveni omonakadona waErasmus ta hokolola
Erasmus Shuuveni (Junior) okwa ti ke udite ombili, ta ti xe okwa li a fiya po omaliko ashike inava mona po sha.
“Paife ondi li momapandaanda handi mono oixuna. Ngeno tate okwa li e li momwenyo ngeno osho onda mana ofikola yange,” ta ti.
Ashike Nestory Shuuveni ou e li ondenge yanakufya Erasmus, okwa ti Celina ota popi oipupulu.
Okwa hokololela Kundana ta ti konima yepako ova ninga eenghundafana naCelina opo a yandje odjapo yefyo vaye keembaanga vaka tale ko oshimaliwa shokufuta oinima oyo kwa li i li meendjo yanakufya ashike Celina okwa anya okuyandja odjapo. “Nakufya okwa li e na eendjo N$68 000 inadi futwa mwa kwatelwa oshimaliwa shokehangano lokuninga omafudiko.
Otwa kala nokudengelwa eengodi komahangano a yooloka taa pula oshimaliwa shavo shi kale sha futwa diva,” Nestory ta ti.
Onghee okwa ti okudja opo ova ya keembelewa nomukulukadi umwe ou ve na ounona vatatu naErastus opo va ka ninge odjapo imwe yefyo vo va dule okukatala ko oshimaliwa keembaanga.
Okwa ti okudja opo ova kufa ko oshimaliwa ndele tava futu N$68 000 osho kwa li shi li meendjo. “Nakufya kakwa li va hombola naCelina ashike ova kala ve li pamwe efimbo lile,” ta ti.
Okwa weda po ta ti ovakwapata ove litopolela eetuwa nhatu omanga otuwa imwe ove i pa po ounona.
“Nakufya okwa hangika ta tungifa eumbo laye komukunda Onamaunda ashike kakwa li la hangika la pwa. Konima eshi a fya onda pula Celina ngeenge ota dulu eumbo olo ile nandi li kufe po. Okwa lombwela nge ta ti ite li dulu onghee okudja opo onda longifa eumbo olo fiyo tali pu nola ninga po lange,” Nestory ta ti.
Ehangano hali kwafele ovanhu moipambele yopaveta loLegal Assistance Centre ola ti Celina na kwatafane nombelewa yavo opo a dule okukala a yambididwa kombinga yoshikumungu eshi.