Ovanadolongo vamwe ohava etelwa oimbodi modolongo

Commissioner koshikondo shomavyulonghalo moNamibia Sam Shaalulange okwa ti ovakwanedimo vamwe ohava kendabala okutwalela ovakwapata vavo oimbodi ya nyika omaulodi modolongo.

Shaalulange okwa hokolola ta ti eefamili ngeenge tadi ka talela po ovanaolongo komavyulonghalo dimwe ohadi twaalele oinima oyo inai pumbiwa mo meenhele dodolongo. Oinima oyo oya ya kwatela mo oingangamwifi ngaashi omapangwe, oimbodi ya nyika omaulodi neengodi dopeka.

Okwa ti unene tuu ngeenge eefamili tadi etele ovanadolongo oikulya odi hole okutula oimbodi ile omapangwe pokati keemboloto omanga vamwe ove hole okutula meefewa.

Okwa tofa mo omavyulonghalo omoWindhoek oku na omwaalu u li pombada mokukwatwa noinima ei inaya pitikwa okukala novanadolongo, omanga evyulonghalo lokoMariental oli li poutivali. Neudo moWindhoek omwa kwatwa ovanhu veli 151 tava kendabala oku ndjodjela oinima ya puka modolongo, nomoMariental oveli 99.

Shaalulange okwa ti aeshekumwe, omavyulonghalo moNamibia neudo okwa kwatwa noingangamwifi neengodi dopeke loikando 328, okudja ketameko lodula.

Shaalulange edi okwedi popya Etitano pefimbo va telela po evyulonghalo laWindhoek pamwe nonambelewa vakwao, omo kwa li tava popi kombinga yoingangamwifi ya kwatwa novanadolongo. Shaalulange okwa ti okwa didilikwa ovanadolongo vahapu tava kwatwa noingangamwifi ya nyika oshiponga, omanga vamwe ohava kala ve na eengodi dopeka.

“Otwa didilika vali eefamili dimwe ngeenge tadi u ya okutalela po ovanadolongo ohadi etele ovanadolongo miti da nyika oshipongo neenghono,” Shaalulange ta ti.

Okwa kunghulila ovanhu opo vaxulife po okukala tava etele ovanandolongo oinimi ei ina i pumbiwa okukala kovandolongo ngeenge veli momavyulonghalo.

Okwa yelifa ta ti omavyulonghalo aishe moshilongo ita ka tambula vali oinima ngaashi oikulya ile eefewa tai di kondje yodolongo kovakwapata.

“Ngeenge omukwapata e na eshi a hala okupa omunadolongo, na kale a kwatafana novanambelewa hava longo komavyulonghalo opo a kale a yandje oshimaliwa ile eshitume komavalulilo ombaanga omunadolongo,” Shaalulange ta ti.

Okwa ti ku keshe ou ta ka hangika etela omunadolongo oinima ina i pitikwa komavyulonghalo ota ka pewa ehandukilo lopaveta.