Omahepeko gopaukashikekookantu oge li mokalemo moshitopolwa shaShana
…Iikolitha niingangamithi ya tothwa mo onga uupyakadhi uunene
MAHEPEKO gopaukashikekookantu moshigwana oshowo momagumbo onkene taga tsikile okukala uupyakadhi moshilongo ashihe.
Iifokundaneki oshowo oonzo dhokupititha omauyelele kehe esiku otadhi pititha aanona, aakiintu oshowo aalumentu ya taalela omahepeko ga yooloka momagumbo.
Shika ohashi vulu okunkundipaleka omadhilaadhilo ganakuningilwa omiyonena noku eta omaupyakadhi galwe ga gwedhwa po ngaashi okuninga oonkalamwenyo dhawo oofupi, pamikalo dha yooloka ngaashi okwiimangeleka.
Omukoanakoni gwiimbuluma yi na sha nomahepeko guukashikekookantu gopolisi moshitopolwa shaShana Monika Nakanyala, moonkundathana naKundana okwali a popi yimwe yomwaambyoka a li a koneke hayi eta omahepeko.
Ta ti, okuza omumvo gwa yi ekwatonkonga moshitopolwa shaShana okwa li lya ndhindhilikwa niipotha 47, omanga omahepeko ga yooloka gopaukashikekookantu, ga li 330.
Omanga nuumvo ekwato koonkondo lyi na iipotha 33, niipotha yomahepeko ga yooloka yi li 303, okuza muJanuali sigo oSeptemba.
“Otwa koneke kutya oluhepo nalo otalu dhana onkandangala momahepeko. Unene ngele megumbo kamu na iiyemo ya gwana, ohashi eta omalungwenye, okunyenyeta sigo tashi eta omadhengathano, ngoka haga holoka momikalo dha yooloka mwa kwatelwa okudhipagathana oshowo okumonithathana iiponga,” ta fatulula ngaaka.
Nakanyala natango okwa totha mo elongithonayi lyiikolitha.
Ta ti, omahepeko okupitila miikolitha ohaga vulu okuholoka natango pamikalo dha yooloka.
“Ope na aantu mboka haya longo omiyonena konima ya nu iikolotha oshowo iingangamithi oshoka shoka ta ningi, ita yoolola ngele oshi li mondjila nenge osha puka oshoka omadhilaadhilo okwe ga piyaganeka niikolitha nenge niingangamithi,” ta popi ngaaka.
Ta gwedha po ta ti, ope na natango mboka ya itaala anuwa moku thigulula omikalo dhaakuluntu yawo.
Ngaashi okudhenga omukiintu gwe oshoka anuwa nayina okwa li ha dhengwa kuhe.
“Oyendji oya taalela omahepeko ga yooloka momagumbo, ihe oya mbandamekwa, kaaya pitithe mo omawulele ngoka. Opolisi ohayi longele kumwe naahungimwenyo, mboka oyo ye na ontseyo nkene nakuninga oshihakanwa e na oku eta uuyelele awuhe,” ta fatulula ngaaka.
Ta kumagidha oshigwana shi kale hashi lopota kuyele uuna sha longelwa omiyonena, ngaashi okukwatwa koonkondo, okukwathelwa kuyele ngaashi okupewa
omiti dhoku keelela omikithi oshowo omawupyakadhi taga vulu okuholoka.
“Okulopota kuyele natango ohaku vulu okukwathela aakonaakoni ya mone uuyelele wa pumbiwa okumona uukwashili moshipotha, opo oshipotha kaashi kane,” ta fatulula ngaaka.
Ta ti, omadhipagathano ohaga holoka omolwomatompelo ga yooloka nomolwomawupyakadhi ga yooloka.
“Omadhipagathano pokati kaantu ye li mekwatathano lyopahole, unene ohaga holoka sho kaape na uushili oshowo emangulukilathano pokati kaaholike yaali,” ta popi ngaaka.
Ta kumagidha kutya ohole inayi longithwa onga uuhupilo, nayi kale yi li moshili uuna pe na ekwatathano lyopahole pokati kaantu yaali.
SelmaNewakaelimomumvogwahugunina moshiputudhilo shopombanda, ta ilongele eshungomwenyo okwa ti okwa ndhindhilika kutya omahepeko otaga shuna ashike pevi, uuna oshigwana tashi itula mo momalongo oshowo momakumagidho tashi pewa.
“Aantu ohaya longo omiyonena ye li kohi yiikolitha, yiingangamithi, ihaye shi ningi oshoka kaye shi shoka taya ningi, ihe ohaye shi ningi nelalakano, oshoka omanga inaaka nwa
nenge inaaka hila iingangamithi mbyoka, oha kala e na endhilandhilo ndyoka,” ta fatulula.
Ta ti, okulonga omiyonena ihaku holoka momandhilaandhilo gomuntu omanga e li kohi yiikolitha, ihe okwa kala nendhilaandhilo ndyoka, niinima mbyoka oye mu pe ashike oonkondo dhokwaana ko nasha.
“Onkene oshigwana osha pumbwa omalongo ga gwana nkene shi na okuninga nenge onkatu shi na okukutha uuna sha iyadha shi li momaupyakadhi ga yooloka,” ta popi ngaaka.
Ta gwedha po ta ti, natango osha pumbwa okutseya uunene wiiningwanima, opo shi kale shi na ontseyo kutya oshike shi li mondjila naashoka kaashi li mondjila.
“Otandi gandja oshiholelwa shomunamimvo 47, ta kwata okanona komimvo 10 koonkondo. Omulumentu ngoka ngeno okwa li ena ontseyo kutya ota yonopo okalamwenyo ye oshowo onkalamwenyo yokanona konima yoshiningwanima shoka, ngeno ite shi ningi, oshoka omandhilandhilo ge oga gundjilikwa komauyelele a mona,” ta fatulula ngaaka.
Hugunina okwa ti, elongo neuveko otali dhana onkandangala momahepeko, notashi vulu okushunitha omwaalu gwiiningwanima yomaludhi ngoka pevi.