Esesupo mema kalininkisire nomukunda ntatu domoZambezi dikare dahana mema
Epiro yimaliwa vawpukurure makero gomema ndi notenga edi adi gava mema konomukunda ntatu momukunda horowero gwaKongola ngesi kuna kara nye asi vatungimo kuna kara makwedi gatatu kwahana mema.
Eyi kayinkondopekere kansela gwaKongola Bennet Busihu momapuragero kumwe naNampa apa kavamupulire asi agaveko nkumbu konyima tupu mutungimo gumwe gomomukunda kageve masivano noudigu vana kumona kuhamena epiro mema ntani kupira kugwana elimbururo pausimbu lina kutunda komberewa zakansela.
Nomukunda nye edi dina kara moudigu kuna kara Muyako, Queensland ntani Choi dakara moKongola moZambezi.
Mpitisili gomonkarapamwe momukunda Queensland Martin Lukato, ogu ana kara hena asi mpitisili gombunga za NDP katente asi nomukunda odo kudipakerera kuna kara nye novantu wokusika konyara 3000 -4000 vatungimo awo ngesi kuna kutruganesa tenga zimwe tupu zomema monomvhura dononzi nye ngesi kwato yina kurugana hena, eyi yina kuninkisa vatungimo noyimuna yawo vakare makwedi gatatu kwahana mema.
Age katente asi awo ngesi kuna kukaveta mema komukunda ogu gwavakarera pepi, omu yina kara asi nokilo ntatu ngoso, nye mukunda gwina nago kuna kara noudigu womema gana kusesupa.
Mpito zina karapo zokugwana mema noureru ntudi kugenda no kilo 12, ntani nokagwana nye mema. ‘’ Oku kuna karako rukukutu.
Mpito zina karako zokugwana mema ntudi tohundire ogu ana karako nehauto lyenene akuretere mema, nye eyi kuhoroka nsene asi ono kara noyimaliwa ofute ogo mwenya ehauto.
Nsene kwato yimaliwa, ove tokara ngorooro kwahana mema mazuva gomanzi.
Mukaro kapi guna wapa yina wapere vantu vene vana kara megendeso vana kara nomarunone vawizemo pangenderera,’’ yimo ana kutanta Lukato.
busihu katanterere Nampa asi age ana divako Yuma koudigu wangesi, morwa udigu ou wanare una kwata nomvhura, nye eyi yakwatera siruwo morwa epiro simaliwa ano eyereko lyosimaliwa esi ngesi kapi lina kulikida asi yingapi navaruganesa mokuwapukurura makero ogo ntani asi gangapi gomape navasimako.
‘’ Moomu tupu ono yidiva, ose kuna wiza momberewa sinkwa ntani tupu an oose ngesi kuna kukambadara nye tuwapukurure nomberewa detu makura tutare asi nina yinke eyi yina pumbwa pangenderera.
Yimo, vantu vanzi unene vana hara mema rambangako yimuna yawo; ame nadiva udigu waQueensland nye yimaliwa kuna kara udigu, ano koChoi, vantu vanzi ose kuna kugazara asi tuka mbororeko mbora zimwe ezi nazikara pokatji, nye nampili ngoso tuna pumbwa yimaliwa yimo ana kutanta Busihu.
Age katente asi mberewa zendi zina turapo tenga zomema zokukwateramo zina kara poChoi primary school, omu vatungimo vagwane mema posiruwo esi, ano mberewa zendi azo kuna kundindira nye eyuereko lyosimaliwa vayamborore ekero lyonosola eli nalivatera nye vantu wovanzi unene.