Ouministeli welongo mOhangwena wa longifa eemiliona mohiila

OSHIKONDO shelongo moshitukula shaHangwena onghene tashi twikile okufuta oshimaliwa shoN$320 000 komwedi ketungo loGreywall Complex oyo Eenhana morentinga shaashi etungo louministeli olo tai tungilwa kepangelo ola kanghama.

Omukulunhu welongo moshitukulwa shaHangwena Isak Hamatwi okwa ti etungo olo ola kala la fikama okudja momudo 2018, eshi omutungi oo a li a pewa a tunge a dopa okumana oilonga yaye pefimbo. Hamatwi edi okwe di popya pefimbo lomutumba waavo ve na mo onhumba mehongo wa li kEembaxu moshitukulwa shaHangwena.

Omukulunhu welongo ta ti ova kala tava hiila okudja eshi ombelewa yavo ya tembuka ko kOndangwa koshitukulwa shaShana, ya ya kEenhana mo2012, oko va dja novanailonga ve li 120, nonghee fiyo opapa ova tuta oshimaliwa sheemiliona N$30. 7 kehangano loGreywall Property oko va ninga omido tava rentinga.

Ta ti oilonga yehangano olo la li la pewa ngeno li tunge ombelewa oya li ya xulifwa po kouministeli wElongo, Ounghulungu nOmifyuululwakalo konima eshi la dopa oku onga oilonga yalo, nola li ashike la pondola okuwanifwa po eepelesenda 24 doilonga.

“Ehangano olo paife otali lwifa exulifepo loilonga oyo,” Hamatwi ta ti, ye ta weda po kutya omafiku aa okwa ulikwa omushivinawa moikwamatungo opo a tale nawa nokushange olopota okuulika kutya etungo olo la efiwa ola fikama pamufika ulipi po, vo va yandje osheetwa po shavo onga ouministeli omanga inava tuma omushangwa oo kombelewa yomweeti woihokolola-ndjai wepangelo. –Nampa