News in Oshiwambo
PRESIDENTE Hage Geingob okwa ti omaumbo e li 160 oo fiyo onena ehe na ovanhu ota otaa ka longifwa oku hola omuvalu wovanhu nokuxwepopeka engudumano lovanhu ovo ve li momalukanda moWalvis Bay, Swakopmund noArandis osho shili onghendabala yepangelo okulwifa etandavelo lombuto yoCovid-19.
Geingob ta ti, oshi li oshinakuwafina shomalelo eedoolopa nhatu omo mwa dja eepelesenda 90 daavo va monika ombuto okukonga eenhele dopakafimbo di na omeva noundjuwo, omo tamu kala ovanhu ovo tava kufwa komalukanda oko mopaife ku yadi unene, nengudumano lako otali dulu okutandavelifa omukifi.
Fiyo opapa epangelo ola mona po omaumbo 60 koSwakopmunda no100 koWalvis Bay naao otaa ka nangekwa ovanhu pakafimbo.
Geingob ta ti, otashi ulike kutya oshilongo osha taalelwa keenghalo di li mbali detandavelo loCovid-19, onghalo imwe oyoyo yokoWalvis Bay, naikwao oyoshilongo ashishe, neenghalo edi di li mbali oda pumbwa okulwifwa she likolelela konghalo.
Omupresidente ta ti onghalo oyo i li koWalvis Bay oya pumbwa eenghono nelitulomo la wedwa po opo ku kondekwe etandavelo lombuto oyo ya hanya kodoolopa oko, oku yeleka noitukulwa ikwao moshilongo.
“Eshi shi tilifa osheshi ombuto tai li tambulafanwa pokati komukwashiwana nomukwashiwna moWalvis Bay. Fiyo onena oitukulwa ikwao moshilongo oya lopota ovanhu ve na ombuto ashike ove ya mo moitukulwa omo. Onda hala oku udanekela oshiwana kutya epangelo otali longo nelitulo mo oku kondjifa onghalo oyo ya taalela oshilongo, neenghendabala di wetike nodi na eenghono oda tulwa peenhele,” Geingob ta ti.
“Omukifi moNamibia owa tandavela ina pa kalwa naashi otashi pula opo epangelo li katuke onghatu yomeendelelo opo ku kondekwe onghalo oyo ya taalela oshilongo. Vali ovakwashiwana vetu navo ova pumbwa oku li tula mo noku fya oshisho kutya navo ove li amena voovene paku li ufa komalandulafano, opo ashike oshilongo tashi dulu oku kondeka etandavelo lombuto ei,” Omutwe woshilongo tau ti.