RM27.12j kena bejalaika mayuh bengkah projek sosioekonomi Pelilih Menua Song

Perintah Sarawak udah ngungkupka sepenyampau RM27.12 juta dikena bejalaika mayuh bengkah projek sosioekonomi di Pelilih Menua Song kena ngurangka penyeranta di pelilih menua nya.

Menteri Pemansang Indu, Nembiak Mit enggau Pengelantang Komuniti, Dato Sri Fatimah Abdullah madahka, ungkup belanja nya nyengkaum RM24.9 juta kena bejalaika 116 projek Program Transformasyen Menua Pesisir (RTP) enggau RM10 juta ungkup 129 projek ari baruh Program Ngaduka Baru Rumah Rayat Seranta Sarawak (PPRMS).

Kena nambah, sepenyampau RM1.22 juta udah diungkupka ngagai pemansang sosioekonomi di Pelilih Menua Song ari baruh Ejensi Pemansang Ulu Rajang (URDA).

Nya, ku iya, nyengkaum program pengawa dagang, program pemansang ikan darat, program latih pengelandik enggau sukung komuniti ngagai ruang bilik seranta di Pelilih Menua Song.

Iya madahka pekara nya lebuh ti nyaut tanya ari Lidam Assan (GPS - Katibas) pasal chara ti dipejalaika opis menteri kena ngurangka penyeranta di Pelilih Menua Song.

Pelilih Menua Song ku Lidam, udah diaku nyadi siti ari pelilih menua pemadu seranta bepelasarka data Opis Statistik Malaysia (DOSM) 2020.

Fatimah mega madahka, Perintah Sarawak benung bejalaika mayuh bengkah chara dikena betapi enggau isu penyeranta lebih agi di kandang menua pesisir.

Ku iya, nya nyengkaum pengawa nyendiaka infrastruktur pugu enggau utiliti, ngaga kapasiti, akses ngagai servis pengerai enggau pelajar sereta mayuh bengkah projek sosioekonomi enggau pengawa berumah.

Ditanya pemayuh peranak balat seranta enggau seranta di Pelilih Menua Song, Fatimah madahka, bepelasarka statistik penyeranta eKasih nyentuk ngagai 15 April 2024, bisi 461 tuai ruang bilik (KIR) balat seranta enggau 774 KIR seranta ba pelilih menua Song.