Tiga pengerami diintu begulai nyadi pelasar pemadu manah nyerakupka pupu raban bansa
Tiap pengerami di nengeri tu baka Gawai, Hari Raya Aidilfitri enggau Taun Baru China dipeda nyadi pelasar pemadu manah nyerakupka pupu raban bansa.
Menteri ba Opis Premier Sarawak, Dato Sri John Sikie Tayai madahka, pengerami Gawai sebaka enggau pengerami Taun Baru China, Hari Raya Aidilfitri enggau ke bukai ti ukai semina diintu siti bansa tauka etnik aja tang pengerichah sama dikunsi enggau bansa bukai.
“Chunto pemadu manah iya nya semua raban bansa enda ngira bansa enggau jalai pengarap sama ngambi peluang ngabang tauka nemuai ngagai kaban belayan tauka bala bakih lalu sama ngerami pengerami ti diintu,” ku iya.
Iya madahka pekara nya maya bejaku ba pengerami ngintu Gawai Dayak, Hari Raya Aidilfitri enggau Taun Baru China 2024 ti diatur Tuai Komuniti enggau Tuai Komuniti Bansa (KMKK) Pelilih Menua Tatau ditu, malam ensanus.
Sikie madahka, nyema semua orang meda pengawa ngintu tiga pengerami diatur
begulai tu ke digulu pupu bansa, ia ngayanka kaul rat ti meri awak ngagai semua ke datai ngenegapka penegap runding bekaban enggau bekunsi.
Kaban Kunsil Nengeri (ADUN) Kakus nya madahka, tu ngayanka Sarawak iya nya chunto pemadu manah penyerakup bansa di menua tu taja pan raban bansa bebida jalai pengarap enggau adat.
“Tang nama ti nyadi nyata semua orang ulih duduk semija sereta berandau enggau
pangan diri lalu tu patut ditanka enggau ditampung rebak dudi,” ku iya.
Ku iya, penyerakup ke bisi di Sarawak ngemuntangka pengawa bejalaika agenda pemansang ke dibai perintah Gabungan Parti Sarawak (GPS) ti seraya nyadika Sarawak ba tangga ketiga pemadu besai mai penguntung dalam Pemansut Dalam Menua Kasar (KDNK) menua.
“Ngena penyerakup enggau kerejasama tegap semua
bansa nengeri tu ari baruh iring Premier Sarawak Datuk Patinggi Tan Sri Abang Johari Tun Openg, enda patut enda ulih Sarawak niki ngagai tangga kedua dalam timpuh dua tauka tiga taun ti deka datai.
Ba pengerami nya, Sikie mega bisi madahka bantu geran Projek Mit Menua Pesisir (MRP) sepenyampau RM30,000 ngagai KMKK Pelilih Menua Tatau kena bejalaika aktiviti tiap taun sida.