Sarawak nengeri keterubah ngatur forum mengeri
Sarawak deka ngatur forum mengeri ungkup nengeri tu empu ti disebut ‘Forum Bandar Sarawak’ (SUF) dalam bulan September taun tu di mengeri besai ditu.
Sapit Menteri Utiliti enggau Telekomunikasyen, Datuk Dr Abdul Rahman Junaidi madahka, SUF nya asil penemu pengudah Dewan Bandaraya Kuching Utara (DBKU) nyadi ‘tuai rumah’ tauka pengatur Forum Bandar Malaysia (MUF) taun nyin kemari ditu.
“Kitai udah bulih ‘lampu gadung’ tauka pemendar ari Premier kitai deka ngatur forum mengeri ungkup kitai kediri, enggau Sarawak iya nya nengeri keterubah ti ngatur forum baka tu,” ku iya.
Iya madahka pekara nya ngagai raban pengarang berita maya dirandau ba pengerami Hari Raya Aidilfitri Pusat Khidmat ADUN N.4 Pantai Damai di Jalan Haji Taha ditu, kemari.
Ngenang silik pasal SUF, Dr. Abdul Rahman ti megai tanggung pengawa dalam pekara DBKU madahka mayuh aktiviti deka diatur sepemanjai forum empat hari
nya ila.
Pekara ti manah maya forum tu ila, ku iya, forum nya deka nyengkaum komuniti dalam nengeri tu aja baka sida kaban majlis, nembiak sekula enggau universiti sereta gerempung ukai dikuasa perintah (NGO) ti bekaul enggau rampa menua.
“Kitai mega deka ngangauka pengelicha ari mengeri chunto baka Tokyo, Kyoto, Osaka enggau Kobe di Jepun ngambika nyadi panelis maya forum tu ila.
“Alai forum tu diatur deka nyengkaum sekeda endur baka Hikmah Exchange nyadi palan besai, Padang Merdeka, Pustaka Negeri Sarawak, Tebingan Kuching,” ku iya.
Bekaul enggau MUF, edisyen ke-6 MUF deka diatur di Johor dalam bulan Oktober taun tu.
Sarawak udah dipilih nyadi pengatur MUF edisyen ke5 taun nyin kemari enggau ti keterubah di luar Klang Valley.