Raban Orang Indu PBB Machan udah ngatur kus Ngaga Selampai Sulam Moden
Raban Orang Indu Parti Pesaka Bumiputera Bersatu Sarawak (PBB) Pampang Machan udah ngatur kus Ngaga Selampai Sulam Moden enggau tuju deka nerenakka pengelandik baru ngagai orang indu di kandang menua tu.
Program tu udah diatur ba Rumah Untol, Jalai Menalun Sungai Poi lalu tu udah nerima sambut ti manah ari Raban Orang Indu PBB Ranting Ulu Poi enggau Ranting Lepung Poi.
Kus ti betuaika Ketuai Raban Orang Indu PBB Pampang Machan Datin Sri Dato Catherine Gramong begulai enggau bala eksko iya.
Catherine madah, dalam pengawa ngerembaika pemaik program tu, sekeda Ranting PBB di Pampang Machan mega udah dikangau ngambi bagi nyengkaum Ranting PBB Ranan enggau Ranting PBB Maong di Jalai Kanowit-Durin.
Ku iya nerang, tuju besai program tu iya nya ukai
semina ngajar pengelandik nyulam, tang mega meri bala orang indu di kandang menua tu penemu dalam pengawa asil pengelandik jari.
“Kelimpah ari tu, program tu ulih mantu nambahka penatai pemisi sida ila,” ku iya lebu ti bejaku maya pengerami tu bedau lama ti udah.
Ketuai Ranting Ulu Poi, Tr Anie Melaka madahka
iya meri besai terima kaih ngagai Catherine Gramong ti udah nyukung enggau bantu ti udah diberika dalam ngemujurka program tu.
Iya pechaya iya nya program tu enda semina deka meri pemaik ngagai bala pesereta tang mega deka meri empas ti positif ngagai komuniti.
Kelimpah ari tu, iya madah
mega pengawa ngatur program bansa tu ukai semina ngangkatka pengelandik seni orang indu di Kanowit tang mega ngadaka peluang ekonomi ti baru ngagai sida.
“Enggau sukung ti rat ari raban ti bekaul enggau komuniti di kandang menua tu, pengarap deka terus ngerembai ungkup pemansang orang indu di Sarawak,” ku iya.