Sekula patut chakah ngemeranka kreativiti ngagai bala nembiak
Kreativiti mai mensia meda sesebuah pekara enggau besai agi lalu nentuka sida ulih ngiga jalai dalam palan ke manah agi ungkup rebak ti deka datai ”
SIBU: Kaban Kunsil Nengeri (ADUN) Bukit Assek Joseph Chieng ngansak raban sekula ngambika ngemeranka kreativiti entara bala nembiak.
Ku iya, nyadi ketuai jemah ila, raban nembiak patut belajar nyadi kreatif sereta inovatif dalam nempa pemanah ulah nyadi ketuai ti tegap.
Chieng nyemetak madahka kreativiti deka mai mensia mayuh meda sesebuah pekara enggau besai agi dalam tetiap aspek ke lalu nentuka sida ulih ngiga jalai dalam palan ke manah agi ungkup rebak ti deka datai.
“Tu ulih nyukung kitai neresa pekara baru sereta mega mantu kami dalam pengelandik mutarka penanggul,” ku iya ba pengerami bejadi Galeri Seni Sekula Sekondari (SMK) Methodist ditu, kemari.
Nitih ku Chieng ti mega ex nembiak SMK Methodist madah endang patut bala nembiak diajar nyadi kreatif ninting maya.
“Tu ngayanka pemesai guna kreativiti. Endang pekara ti beguna mega ungkup nembiak berunding ari luar kutak runding sida,” ku iya.
Beserimbai enggau nya,
Prinsipal SMK Methodist Philip Ling madah begunan galeri tu iya nya ke suba begunan kayu ti puang lalu kala nyadi endur diau tukang tebas sekula.
Ku iya, tu pengujung nya nyadi galeri pengudah nerima pemendar ari kaban ‘Lembaga Sekolah’.
Berindik enggau pengerami tu, Chieng mega udah madahka meri RM5,000 dana Projek Mit Menua Pesisir (MRP) ungkup galeri seni nya.
Sama datai ba pengerami tu iya nya Chairman Gerempung Apai Indai enggau Pengajar (PIBG) sekula Ting Wei Ping.
“Tu ulih nyukung kitai neresa pekara baru sereta mega mantu kami dalam pengelandik mutarka penanggul.