200,842 bakul pemakai udah disadung ngagai peranak alai neritka PKPD
KUCHING: Bisi 200,842 bakul pemakai ke beungkus RM17.4 juta udah disadung ngagai peranak ti alai neritka Atur Nagang Pemindah Diteritka (PKPD) di serata nengeri tu.
Menteri Pengelantang Pendiau, Komuniti, Orang Indu, Ruang Bilik enggau Raban Bansa Dato Sri Fatimah Abdullah madah, pengawa nyadung bantu ke diberi Opis Pengelantang Pendiau Raban
Bansa Sarawak (JKMS) nya mungkur 197,997 Ketuai Ruang Bilik (KIR) naka 18 Julai taun tu.
“Enti kitai meda statistik taun siti nyin tadi, semina dua iti palan aja alai neritka PKPD enti dibandingka enggau taun tu ke bisi 1, 439 alai neritka PKPD ke alai kami udah nyadung bakul pemakai nya ngagai 197,997 KIR.
“Lalu naka 18 Julai tu, bisi 62 kandang menua di serata
Sarawak mengkang diteritka PKPD ke alai di bagi menua Sarikei bisi (13), Betong (10), Kuching (9), Sibu (8), Kapit (7), Bintulu (7), Miri (7) enggau Sri Aman (1),” ku iya kebuh ke dirandau media pengudah nyuaka bakul pemakai ba Kampung Tabuan Melayu ti benung diteritka PKPD ditu kemari.
Ku iya, perintah Sarawak seruran beratka pengelantang pendiau rayat lalu siti ari nya nengah pengawa meri bakul pemakai ngagai orang ti benung diteritka PKPD.
“Ba tetiap kandang menua ti diteritka PKPD tau pemindanh betagang, perintah Sarawak deka nganjung barang pemakai baka berau, gula enggau ke bukai ungkup kandang dua minggu.
“Nyema PKPD nya dilanjarka timpuh, perintah Sarawak nengah JKMS deka nyadung baru bantu ngagai peranak nya dalam timpuh nya,” ku iya.
Kelimpah bakul pemakai nya, Fatimah mega madahka perintah Sarawak bisi meri pemakai ba kandang pengawa ngempang jalai (SJR) ti dipejalaika, palan kuarantin enggau orang ke benung dikuarantin di rumah.
“Semua bantu tu mungkur belanja ke besai. Nya alai, kitai patut meri terima kasih laban perintah semampai beratka pengelantang pendiau rayat sereta nentuka orang ti benung tusah nya enda putus stok pemakai,” ku iya.
Berebak enggau tu, iya meri terima kasih ngagai bakih strategik maya nyadung bakul pemakai baka Opis Bomba enggau Penyelamat Malaysia (JPBM) Sarawak sereta ejensi ke bukai.
“Aku gaga ati laban kitai bisi organisasyen enggau koordinasyen ke chukup manah laban niat tuju kitai endang deka mantu mensia mayuh,” ku iya.
Dulu ari nya, bisi 2,471 KIR ti benung alai neritka PKPD di Kampung Tabuan Melayu nerima bakul pemakai ari JKMS.
Nya mungkur 657 KIR di Tabuan Dani, Tabuan Lot (570), Tabuan Tengah (305), Tabuan Lama (430), Tabuan Hilir (329) enggau Tabuan Cemerlang (180).