ATM komited meri kerejasama ngagai KKM betapi enggau COVID-19
KAPIT: Raban Soldadu Malaysia (ATM) komited deka ngenegapka kerejasama sereta mantu Opis Menteri Pengerai Malaysia (KKM) betapi enggau gelumbang ketiga pengelekai pandemik COVID-19 di menua tu.
Panglima ATM Jeneral Tan Sri Affendi Buang madah, tu nyengkaum perengkaguna logistik kena nganjung bantu kereban berubat sereta kereban pengerai ngena perengka pengangkut ATM ti nyengkaum bilun Soldadu Langit DiRaja Malaysia (TUDM).
“Kerejasama enggau semua guna deka ditegapka ba sekeda maya. Tu mega iya nya komitmen ATM dalam pengawa kedua sida kena nentuka pengelantang enggau pengerai rayat seruran dikemerat,” ku iya.
Iya madah munyi nya lebuh ti ngabas enda lama ke Sepital Medan ATM Kapit ti udah bejalaika operasyen kenyau ari 10 Mei tu tadi ba balai Komuniti Melayu ditu, kemari.
Sma bisi iya nya Panglima Soldadu Darat Jeneral Tan Sri Zamrose Mohd Zain, Ketuai Direktor Servis Pengerai ATM Leftenan Jeneral Datuk Dr Zulkeffeli Mat Jusoh, Panglima Medan Timur Tentera Darat Leftenan Jeneral Datuk Mardzuki Muhammad sereta Panglima 1 Divisyen Mejar Jeneral Datuk Dzulkafli Mustaffa.
Pengawa numbuhka sepital medan ba palan bukai, ku Affendi madah, tu bepanggai ngagai guna maya nya lalu tikas pengulih Unit Servis Pengerai ATM.
Dalam betapi enggau COVID-19 diatu, Affendi ngarapka tetiap komuniti meri kerejasama sereta ngasika atur enggau prosedur operasyen standard (SOP) ti dipansutka perintah dalam nentuka rentayan pandemik tu ulih diputuska ungkup pengelantang semua.
Beserimbai enggau nya, bepelasarka surat berita Markas ATM Unit Pekara Mensia Mayuh, Servis Pengerai ATM nengah Kor Pengerai DiRaja (KKD) udah ngatur pengawa staf sereta kereban Sepital Medan ATM ke Kapit kena 6 Mei tu tadi.
Ku iya nerang, sepital tu iya nya sepital ti kedua bansa tu ke digaga pengudah pemujur sepital ti sama di Tawau, Sabah
Nengah tusun atur raban Batalion Keterubah Pengerai ti ba Kem Muara Tuang, Kota Samarahan enggau kerejasama Opis Pengerai Nengeri Sarawak sereta Sepital Kapit, sepital medan tu bejalaika pengawa nyendiaka perubat ngagai pesakit bukai kelimpah ari COVID-19, ku iya nambah.
Nitih ku iyam sepital ti ngembuan kapasiti 40 katil nya mega udah disikap enggau perengkaguna wad, farmasi, X-ray enggau bilik berubat penusah ngenyit.
“Nengah perengkaguna ti disediaka tu, tu deka nentuka Sepital Kapit ulih mekuh ngagai servis berubat kes COVID-19, kelimpah ngembuan kapasiti katil ti chukup ungkup pesakit pandemik nya enggau kes ti serius agi.
“Sepital medan tu bejalaika operasyen 24 jam sehari, tujuh hari seminggu lalu entara servis ti disediaka iya nya ngubat pesakit dalam (12 jam sehari nitihka gintir ungkup pengereja pengawa klinik) lalu servis unit administrasyen enggau sukung (pukul 7 pagi nyentuk 4 lemai),” ku iya.
Iya madahka, kenyau hari keterubah nerima pesakit kena 10 Mei nyentuk 14 Mei, bisi tujuh pesakit udah diengkah di sepital tu lalu siku udah dikemendarka pansut.
“Naka ke diatu, penyampau pesakit ti bisi iya nya enam iku, lalu kes beputung bedau dipejalaika agi di sepital tu.
“Taja pia, tikas pengulih sepital tu ulih ditambahka agi enggau servis palan beputung sereta ‘Unit Rawatan Rapi’ (ICU) nyema diguna,” ku iya.
Naka diatu,ATM udah ngengkahka enam iku pemesai nyengkaum Lt Kolonel Dr Saiful Anuar Ju@Ju Ahmad ti nyadi Komander Sepital Medan tu.
Kelimpah ari nya, bisi tiga pemesai perubat, siku pemesai khas, siku pemesai administrasyen sereta 53 iku iya nya 32 paramedik lalu 21 iku raban servis sukung.
Pia mega, KKM iya nya bisi 10 iku misi lalu enam iku raban servis sukung.
Semua nya, ATM enggau KKM udah ngengkahka pengereja pengawa enam pemesai enggau 69 iku staf di sepital medan tu.