SABERKAS patut seriris enggau peminta raban nembiak kemaya hari tu
MIRI: Gerempung Serakup Nembiak Sarawak (SABERKAS) patut seriris enggau peminta raban nembiak kemaya hari tu kena nentuka tanggungpengawa mengkang relevan ngagai raban nya.
Menteri Nembiak Lumba enggau Main ke mega Sapit Presiden SABERKAS, Datuk Abdul Karim Hamzah madah, pekara tu beguna kena meda penunduk SABERKAS nyadi gerempung raban nembiak ti besai di nengeri tu.
“SABERKAS ke mega gerempung raban nembiak ke besai di Sarawak deka terus bejalaika tanggungpengawa dalam ngenegapka pengawa, ngemayuhka penyereta raban nembiak sereta tikas pemujur raban nembiak diatu dalam bidang ti dikerindu enggau ke diguna sida, seriris enggau pemansang jeman diatu,” ku iya.
Iya madah munyi nya lebuh bejadika pengerami makai malam begulai enggau pengari Aum Besai Tiga Taun Sekali SABERKAS ke-16 ditu malam ensanus.
Nerang sejarah pandak sentang penumbuh SABERKAS, Karim ke mega Menteri Dagang Temuai, Seni enggau Main Asal madah, nya ditumbuhka kena 1972 ti nyadi platform ungkup raban nembiak mungkur diri dalam gempung tiga institusyen nya baka Kelab Belia Melayu Sarawak, Sarawak Youth Council enggau Kelab Bidayuh Sarawak.
“Tiga bengkah institusyen tu udah besetuju, baum nyadika saberkas tauka nyadi dalam siti gembung enggau pengawa bejadika SABERKAS udah diatur kena Mac 1973.
Ari taun 1973 nyentuk diatu, urung 47, 48 taun SABERKAS ulih ngatur pengawa, bediri kediri, bebendar deka ngangkatka agi penau raban nembiak kelimpah nagtur aktiviti raban nembiak ungkup nengeri Sarawak,” ku iya nerang.
Semanjai sesi 2017 ngagai 2020, mayuh bengkah program udah diatur ba renggat nengeri, pampang enggau unit mantaika penemu enggau pengelandik raban nembiak.
Entara nya baka Karnival Lumba enggau Main SABERKAS (KASUS), Program Kawanku Sayang, Keluargaku Kenang, Jerayawara Bubur Lambuk SABERKAS Bernas, Program Belanda SABERKAS, Sarawak Youth Talent, Kus Pengelandik Raban Nembiak, Kus Betanam Betupi enggau ke bukai agi ti ngemeratka guna sereta pekara ti dikerindu raban nembiak.
Nerang silik sentang pengerami nya, tuju nya diatur kena ngintu enggau meri selamat datai ngagai semua deligasyen pengari ti ngulu aum ke Miri.
Aum iya nya program pemadu besai dalam kalinda SABERKAS ti dipenyadika Kepala Menteri ke mega Presiden SABERKAS, Datuk Patinggi Abang Johari Tun Openg.
Sama bisi datai iya nya Menteri Muda UndangUndang, Kaul Nengeri enggau Perintah Besai enggau pematau Projek, Datuk Sharifah Hasidah Sayeed Aman Ghazali enggau ADUN Daro ke mega ari Sekretari Besai SABERKAS, Shafiee Ahmad.