Penguang minta Ali Biju enda ngetanka kerusi DUN Krian ba PRN
MIRI: Mandal Presiden Parti Demokratik Progresif (PDP) Datuk Penguang Manggil minta Sapit Menteri Kuasa enggau Pengeraja Asal Ali Biju enda ngetanka kerusi Kunsil Nengeri (DUN) Krian maya pengawa bepilih nengeri (PRN) ti deka datai enggau berindik ari beratka penaluk ngagai ‘Sarawak First’, ensana.
Ku iya, parti nya sedia deka malas enggau nyukung iya di Saratok maya Pengawa Bepilih Besai ila, kerusi parlimen asal disatup PDP tang alah ba jari Ali ti bediri minta pilih nengah tikit PKR maya pengawa bepilih nyin tadi.
“Nengah penaluk ‘Sarawak First’, iya patut enda ngetanka kerusi sitak Krian sereta ngelakka PDP bediri minta pilih ditu,” ku iya.
Ali ke mega penyandang sitak Kunsil Nengeri Krian, diatu udah nyemilik Parti Pribumi Bersatu Malaysia (Bersatu), kaban politik dalam perintah besai Perikatan Nasional (PN) pengudah perintah Pakatan Harapan tumbang pun taun tu tadi.
PDP iya nya komponen Gabungan Parti Sarawak ti mantu PN numbuhka perintah pengudah menua napi penyarut politik, ketegal Menteri Besai Tun Dr Mahathir Mohammad udah ningkilka diri.
Parti nya deka bediri minta pilih ba semua kerusi asal, lalu Ali ke udah nyemilik Bersatu sama enggau raban politik ke pambar dalam parti ke sama ti betuaika Menteri Besai Tan Sri Muhyiddin Yassin ke mega presiden parti.
Lima kerusi asal iya nya kerusi Meluan, Marudi, Ba kelalan, Krian enggau Tasik Biru.
Kerusi asal PDP tang di menang chalun terus BN iya nya Batu Danau (Palus Palu Gumbang), Bekenu (Rosey Yunus) enggau Pakan (William Mawan Ikom) ti diatu dalam parti PBB, parti tulang belakang GPS.
Penguang ke mega Menteri Muda Kaunsil Kandang
Menua madahka GPS bisi sempekat enggau PN nyengkaum Bersatu enda patut engkah chalun ba kerusi nya.
Taja pia, pintu tetap ditelenga alai sama berundingka pekara nya.
“Kami seruran ulih enggau berunding sereta bebatak asur,” ku iya.
Ku Penguang, PDP iya nya parti politik Sarawak ke ngembuan ketuai enggau raban ti komited ba kuing ngetanka hak enggau ke pekara ti dikemeratka semua rayat Sarawak enggau nengeri.
Iya ngarapka Ali ulih meda pekara ke besai agi ungkup ‘win-win situation’ nengah nyukung PDP di Krian maya pengawa bepilih nengeri lalu malas baru meri sukung di Saratok ba Pengawa Bepilih Besai ke-15.