IBT ke bisi orang dipelanja deka dibayar insentif KIR dalam bulan September
KUCHING: Apai Indai Tunggal (IBT) ti udah ditukuka bisi orang dipelanja (dengan tanggungan), deka dibayar insentif Tuai Ruang Bilik (KIR) dalam bulan September 2020.
Unit Perambu Ekonomi (UPE), Opis Kepala Menteri nengah penerang berita kemari madah, Perintah Sarawak nerima penerang bisi ubah status ngagai 81,120 penerima asal Bantu Khas Sarawakku Sayang (BKSS) KIR B40 bekaul enggau IBT nadai orang dipelanja (tanpa tanggungan).
Berindik ari pekara nya, Perintah Sarawak nangguhka dulu pengawa mayar ngagai 81,120 penerima asal
BKSS KIR B40 ke udah betukar status nyadi IBT nadai orang dipelanja tauka dikategorika nyadi Bujang dalam Pakej BKSS 2020.
“Pekara tu benung dipejalaika begulai enggau Opis Asil Dalam Nengeri (LHDN) kena ngenukuka status IBT sekalika sida IBT nadai orang dipelanja tauka IBT bisi orang dipelanja.
“Nyema IBT nadai orang dipelanja sida semina nerima insentif BKSS Bujang B40 lalu bayar deka diketuka.
“Lalu ngagai sida ti ditukuka IBT bisi orang dipelanja, sida deka nerima bayar penuh insentif BKSS KIR B40 dalam bulan September 2020,” ku UPE, kemari.
Nya alai, tuduh ti madah bayar udah dikinsil enda betul laban IBT bisi orang dipelanja tu deka nerima bayar penuh pengudah status orang ke dipelanja dituku.
Perintah Sarawak seruran beratka pengelantang pendiau rayat sereta ngenukuka rayat ti kena empas bulih nerima bantu ke patut.
“Perintah Sarawak numbuhka Pakej BKSS 2020 ti enggau tuju ngurangka penusah rayat dalam betapi enggau pemar ketegal pandemik COVID-9.
“Pakej tu udah mantu semua genap serak raban bansa kelebih agi raban kurang penatai pemisi tauka B40,” ku EPU.
Bepelasarka penerang KIR B40 ari LHDN dalam bulan Mac 2020 bisi 406,243 KIR ke patut nerima insentif duit RM250 sebulan dalam timpuh enam bulan, ti udah dibayar ba bulan April ngagai Jun 2020 enggau ungkup belanja sepenyampau RM304.68 juta.
Kelimpah ari nya, Perintah Sarawak mega mantu raban orang bujang/dara B40 dalam Pakej BKSS 2020 sereta bepelasarka penerang LHDN bulan April 2020 bisi 114,683 bujang/dara ke patut nerima insentif mata duit sekali meri iya nya sepenyampau RM500 lalu udah dibayar dalam bulan Mei 220 enggau penyampau ungkup belanja RM57.21 juta.
Enti dipegulaika semua, bisi 520,926 penerima insentif BKSS B4 enggau perintah Sarawak udah melanjaka ungkus sepenyampau RM361.89 juta kena mayar insentif tu.
Taja pia, Perintah Sarawak agi nerima sebana ari rayat ti madah sida patut nerima insentif BKSS KIR enggau Bujang B40 tang enda dilis nyadi penerima.
“Beduduk ari pekara tu, Perintah Sarawak udah muka apil BKSS 2020 nengah Opis Pelilih Menua enggau ngena chara online. Bekaul enggau tu, Perintah Sarawak mega udah nerima penerang pemadu baru KIR enggau
Bujang B40 ari LHDN ba bulan Jun 2020.
“Bepelasarka apil enggau penerang pemadu baru B40 ari LHDN, bisi 788,534 penerima ti patut iya nya nambah sepenyampau 267,617 penerima tauka 51.2%.
“Penerima nya nyengkaum 369,139 KIR; 301,281 Bujang enggau 118,114 IBT nadai orang dipelanja,” ku UPE.
Perintah Sarawak udah neruska pengawa mayar BKSS 020 B40 nyengkaum pemayuh penerima tambah ke patut ba bulan Julai enggai Ogos ti ngena ungkus belanja sepenyampau RM319.92 juta.