BERSATU Tanjung Manis meri bantu pemakai ngagai peranak di Kuala Rajang
SIBU: Parti Pribumi Bersatu Malaysia (BERSATU) P.206 Tanjung Manis udah meri bantu pemakai ngagai peranak ba Kunsil Nengeri (DUN) Kuala Rajang, kemari.
Ketuai BERSATU P.206 Tanjung Manis Dato Sri Abang Aditajaya Abang Alwi madah, pemeri ungkup renggat keterubah tu endang ari iya empu.
Ku iya, bantu ke diberi iya nya barang ke guna besesehari ungkup ruang bilik ke napi penusah semanjai timpuh Atur Nagang Pemindah (PKP) tu, dikena ngetuka pengelekai virus COVID-19.
“Entara rumah panjai enggau genturung pendiau ba DUN Kuala Rajang ke bisi nerima bantu tu, iya nya Kampung Belawai, Kampung Rajang, Kampung Jerijih, Semalau, Stalon, Sebayang, Tusok, Sare, Selalang, Kampung Seberang, Susur Jambu enggau Muara Payang, Bukit Kinyau sereta sekeda genturung pendiau ke bukai ti nyengkaum 500 iku penerima.
“Entara barang bantu ke bisi diberi iya nya sepenyampau 500 kg gula, 5,000 kg beras, 1,000 pax Mee Hoon, roti crackers enggau 500 butul ai lumai (sirap) oren,” ku iya nengah siti penerang, kemari.
Aditajaya ke mega Sekretari Politik ngagai Ketuai Badan
Pimpinan Negeri BERSATU Sarawak madahka, pengawa nyuaka bantu nya diatur raban ketuai genturung pendiau ba dia empu, lalu udah meri ngagai sida ti nadai apai indai, indai tunggal, orang ke lunggar umur enggau raban ke timpang pendiau.
“Pengawa nyadung bantu pemakai tu mega enda ngira bida politik ke disukung, tang meri awak kelebih agi ngagai raban ti begunaka bantu. Maya timpuh PKP tu dilanjarka baru, mayuh raban ke seranta, kurang penatai pemisi enggau begaji hari napi tating penusah pengidup.
“Pemeri tu mega nyengkaum raban ke napi penusah ba pun penatai pemisi baka orang ke bedagang mit, pekereja ke begaji hari, pekereja kuli kunterik sereta ruang bilik ke mesekin,” ku iya.
Nitih ku Aditajaya, dalam pengawa nyuaka bantu tu, iya mega ngemeratka pengerai tetiap pekereja enggau penerima.
Dikena nentuka pengawa nyadung pemeri tu bejalai enggau manah, ku iya, pemindah raban sida dibagi ngagai tim ngambika enda kelalu mayuh orang begempuru ba siti endur sereta ngemeratka seraka sosial.
“Ngarapka bantu tu ulih nyaup ngurangka tating penusah sida ke begunaka bantu semanjai timpuh PKP tu nyentuk 14 April tu ila.
“Taja pan pengawa tu bisi risiko tang tu patut dipejalai ngambika bekal barang pemakai ke guna besesehari sida enda putus.
“Tu mih tanggungpengawa kitai mensia, nyaup bala ti endang begunaka bantu. Ngarapka ulih meri pemaik ngagai sida,” ku Aditajaya nambah.