Bisi 56 rumah panjai ba Poyut/ Lubok Nibong nerima bantu barang pemakai
MARUDI: Bisi 56 rumah panjai ba kandang menua Poyut/Lubok Nibong enggau ari baruh sitak Mulu udah nerima bantu pemakai ari perintah ti diatur Komiti Mutarka Penusah Ngenyit enggau Opis Pengelantang Pendiau Raban Bansa (JKM) ngagai rumah panjai baka rumah panjai Poyut/Lubok Nibong, ba kandang Long Linei, Sg Tutoh enggau Penam Long Iman dalam sitak Mulu.
Pengawa nyuaka bantu tu disuaka Komiti Mutarka Penusah Ngenyit Pelilih Marudi enggau Palan Servis Kunsil Nengeri Mulu laban Mulu dipegai Dato Gerawat Gala ti nyadi Kaban Kunsil Nengeri (ADUN) nya.
Chara nganjung barang tu bepanggai ba gaya jalai baka nengah jalai darat enggau ngena perau, ungkup sida ti enda ulih dilawa nengah jalai alun.
Kelimpah ari nya, sekeda 26 rumah panjai enggau genturung pendiau ari baruh kuasa Pelilih Telang Usan ke mega mengkang ari baryh pegai Mulu mega deka diberi bantu pemakai baka kambut berau 10 kilogram, minyak sumai, mi sedap, gula tang nadai kopi.
Pengawa nganjung bantu barang pemakai tu berengkah kemari lalu deka dipejalai enggau berenggat, ku penerang nya madah.
Berebak enggau nya, bantu ungkup 43 buah rumah panjai enggau genturung pendiau di Bario deka dipejalaika ari baruh Opis Pelilih Miri enggau Komiti Mutarka Penusah Ngenyit empu lalu chara barang tu dianjung iya nya ngena bilun TUDM laban rumah panjai nya enda ulih datai jalai ngena perengka pengangkut 4x4 W enggau perau panjai.
Barang bantu pemakai tu diberi ngagai ketuai ruang bilik nitihka pintu bilik ke bisi ba rumah panjai sekalika bisi tauka nadai orang diberi maya Atur Nagang Pemindah (PKP).
Ba kandang Poyut/Lubok Nibong, barang pemakai tu deka diberi ngagai Ketuai Komuniti Iban , Pemancha Randi Bundan ti ngari Dato Gerawat Gala ke mega Kaban
Kunsil Nengeri Mulu.
Maya tu, ex-Kaban PKR, Tr. William Endak Tatat mega bisi diberi bantu ari komiti ke alai iya diatu meri sukung ngagai perintah GPS.