8,637 ruang bilik deka nerima bantu pemakai ari Palan Servis Parlimen Puncak Borneo
KUCHING: Bisi 8,637 rintai nama ruang bilik udah ditetapka deka nerima bantu barang ke guna besesehari ari opis Palan Servis Parlimen Puncak Borneo.
Bantu barang pemakai tu dikena ngelempungka tating penusah peranak maya Atur Nagang Pemindah (PKP) ti dilanjarka ngagai 14 April.
Bantu pemakai tu begunaka agih belanja beungkus RM500,000.
Sapit Menteri Industri Ladang enggau Komoditi ke mega Kaban Parlimen Puncak Borneo Willie Mongin madahka udah ngerah barang bantu tu dibagi ngagai rayat.
Barang tu deka dibungkus lalu disadung nengah ketuai bansa tauka pengari ari genturung pendiau nya.
“Pemekal enggau pengereja pengawa kami udah berengkah mungkus barang nya kenyau Hari Enam nyin tadi lalu pengawa nyuaka bantu pemakai tu dipejalaika kena kemari (Hari Satu).
“Aku mega minta ngagai sida ti nganti barang bantu tu liat ati laban pengawa tu begunaka timpuh nganjung ngagai sida ba tetiap genturung pendiau,” ku iya.
Willie meri besai terima kasih ngagai semua ke bekaul, Opis Pelilih Menua, kapitan, ketuai bansa enggau ketuai komuniti, ti udah bekerejasama mantu ngemujurka pengawa tu.
Kelimpah ari nya, Willie mega meri besai terima kasih ngagai Menteri Besai Tan Sri Muhyiddin Yassin mantaika ba pakej ransangan ekonomi ti engkeman ke tuju dikena ngurangka empas besai tekeruga ketegal PKP berindik ari pengelekai COVID-19.
Iya muji Menteri Besai ngambi inisiatif ke tuju ngemansangka ekonomi menua tegap agi, ulih ngetanka tikas ekonomi ti enda tentu dalam ekonomi global.
“Tu endang nyata endar pakej ransangan ekonomi tu mandangka perintah ngamatka semaya nadai siku pan rayat Malaysia tinggal,” ku iya.
Willie madahka pakej rangsangan ekonomi dibantai enggau penerang ke silik sereta nenak.
Ku iya Menteri Besai madah “Perintah tu engka ukai perintah ti diundi kita. Tang aku deka semua kita nemu perintah tu siruka kita.”
Nengah jaku nya, iya madahka Menteri Besai endang ngaku sereta ngaul nengah sentimen rayat Malaysia seraya meri jamin ngagai semua rayat Malaysia perintah Perikatan Nasional (PN)seruran nyaga pengelantang rayat seraya madahka pakej rangsangan ekonomi ti mai reti ke chukup dalam.