Penyampau orang meri darah ngagai sepital Miri majak kurang
MIRI: Tabung Darah Sepital Miri kurang bekal darah enggau purata 10 pint darah diterima ari orang ke meri darah ketegal empas kurang temuai ngagai sepital ketegal irauka dirampit pengelekai COVID-19.
Chairman Kaban Komiti Temuai Sepital Miri Peter Hee madah, penyampau orang ke meri darah ngagai Tabung Darah majak kurang nyentuk 70 peratus sekumbang Atur Nagang Pemindah (PKP) dipejalaika kenyau 18 Mac nyin tadi.
“Orang ke meri darah enggau mensia mayuh anang irau ati laban pengereja pengawa ba Tabung Darah semina diengkah ba Tabung Darah lalu nadai bekaul enggau pesakit ti diperubat ba Sepital nyengkaum pesakit COVID-19.
“Sida semina ba Tabung Darah aja sereta nadai mindah ke bukai,” ku Hee nerang ngagai pengarang berita sentang isu nya kemari.
Hee madah, orang ke meri darah semina mantaika bup meri darah ngagai sekuriti tauka polis ngambika ngemendarka sida tama ngagai Sepital.
Nitih ku iya, bisi enam palan engkah entukar khas disediaka di Tabung Darah ungkup ke guna orang ti meri darah.
“Maya PKP tu, orang ti meri darah semina mantaika bup meri darah ngagai polis enggau sida deka diberi jalai,” ku iya nerang.
Berebak enggau nya, iya ngansak orang ti meri darah sereta mensia mayuh datai ngagai Tabung Darah meri darah dikena nentuka bekal darah chukup ke guna ngubat pesakit.
Kelimpah ari nya, Bulan Sabit Merah udah nyadika Institusyen Latih nya di Jalai Bulan Sabit Merah ditu endur palan ganti ungkup orang ti meri darah ti enggai ngagai Tabung Darah Sepital Miri.
Palan tu dibuka kena Hari Tiga berengkah pukul 8.30 pagi ngagai 12 tengahari enggau pukul 1 lemai ngagai 3.30 lemai.
Palan tu mega dibuka kena Hari Enam enggau Hari Minggu pukul 8.30 pagi ngagai 2.30 lemai.
Sebedau tu, 70 peratus ari asil meri darah iya nya nengah kimpin kin kitu ti diatur ba palan bebelika barang sereta palan gawa tang udah diketuka dulu semanjai timpuh PKP.
Sapit Chairman Komiti Ngatur Pengawa Meri Darah PBSM Miri Kunsilor Karambir Singh madah, pengudah tiga kali beoperasyen, bisi 100 iku udah ngerejista lalu bisi 81 pint darah udah digumpul.
Komiti beterima kasih ngagai Komiti Mutarka Penusah Ngenyit Bagi Menua Miri Datuk LeeKimShinbaataskerejasama iya numbuhka palan ganti nya.
Penerang ke silik ulih betanya ngagai Karambir ba lumur 0168785500.