Tentuka bekal pemakai chukup ba semua palan bebelika barang
KPDNHEP patut nentuka rega barang pemakai dijual nitihka rega ke patut sekumbang timpuh PKP: Awang Tengah
KUCHING: Opis Menteri Dagang Dalam Menua enggau Pekara Penguna (KPDNHEP) Sarawak dipinta nentuka bekal pemakai ba semua 800 palan bebelika barang tauka kedai runchit di selampur nengeri chukup sekumbang Atur Nagang Pemindah (PKP) tu dipejalaika.
Sapit Kepala Menteri Datuk Amar Awang Tengah Ali Hassan madah KPDNHEP mega patut nentuka rega pemakai dijual nitihka tikas rega borong.
Iya madah, majoriti ari 800 palan bebelika barang nya bepalan ba kandang menua pesisir Sarawak mega dikemendar beoperasyen ninting hari ari pukul 7 pagi ngagai 4 lemai.
“Kami deka bekerejasama enggau KPDNHEP Sarawak dikena nentuka tetiap ‘point of sales’ tu bisi bekal barang pemakai ke chukup reti nya peranak menua pesisir bisi endur bebelika barang pemakai. Tu udah pan digaga lalu deka terus dipejalaika.
“Diatu kami deka ngenegapka agi chara magi bantu tu ngagai raban ke ditagit kelebih agi peranak ke diau di
Sapit Kepala Menteri
kandang menua pesisir enggau menua ulu di Sarawak,” ku iya ba aum media pengudah nyadi chairman Aum Komiti Mit Rentayan Bekal Pemakai ditu, kemari.
Awang Tengah ke mega chairman komiti nya madah semua kompeni perengka pengangkut ke ditemu KPDNHEP ke mai bekal pemakai dikemendar Polis Diraja Malaysia (PDRM) nganjung barang ke selampur Sarawak ti enda ditagang.
Perintah ku iya, deka ngena perengka pengangkut Angkatan Tentera Malaysia (ATM) enggau Opis Bomba enggau Penyelamat Malaysia (JBPM) nganjung barang makai ngagai kandang menua pesisir enggau kandang ulu entigis baka di Belaga, Baram, Bario, Batang Ai, Kapit, Ba’Kelalan enggau Long Semadoh.
Iya mega meri jamin bekal pemakai kelebih agi ungkup peranak kandang menua pesisir enggau menua ulu chukup semanjai timpuh PKP diteritka ngagai 14 April tu.
“Komiti Penusah Ngenyit Bagi Menua enggau Pelilih deka mansik Palan Endur Magi ba tetiap bagi menua enggau pelilih nengah kerejasama ejensi perintah, Palan Servis ADUN (kaban Kunsil Nengeri) enggau Gerempung
Ukai Dikuasa Perintah (NGO) ke relevan.
“Tu beguna dikena nentuka pemakai ke dibagi dipejalaika enggau manah sereta nitihka Atur Nagang Pemindah (PKP) lalu nentuka nadai raban ke ditagit tinggal ari nerima bantu tu,” ku iya.
Nerang silik agi, Awang Tengah madah pengawa magi ba renggat genturung pendiau deka ditentuka ketuai bansa enggau ketuai komuniti ba kandang menua nya empu.
Iya nambah, ba mengeri, pengawa meri bantu barang perengkaguna enggau pemakai deka nengah Palan Servis ADUN, NGO sereta ejensi perintah ke relevan.
“Kami deka nentuka penerima bantu tu nyengkaum sida ti nadai dalam rintai JKM (Opis Pengintu Pengelantang Raban Bansa) baka sida ti nadai kereja laban ke diau di rumah sekumbang timpuh PKP tu.
“Tuju pengawa tu iya nya nentuka barang bantu ke dibagi kami nengah agih belanja ti dibantai Kepala Menteri (Datuk Patinggi Abang Johari Tun Openg) beungkus RM16.4 juta ulih diberi ngagai semua rayat ti begunaka bantu tauka raban ke ditagit,” ku iya nerang.
Ku iya agi, pengawa magi barang pemakai enggau ke guna pemun udah pan berengkah kenyau beberapa hari ke udah ba sekeda palan baka di Kuching, Simunjan, Limbang, Lawas enggau Bukit Sari.
“Kami deka nentuka pengawa magi bantu pemakai tu ulih dipejalaika penuh ba timpuh ke semak tu.
Diatu kami benung ngumpul penerang ari sukut penyampau penerima, palan besai endur magi barang pemakai ba endur nya enggau penyampau bekal pemakai ke patut ungkup sesiti kandang menua.
“Aku pechaya tu ulih dipejalaika kitai dalam timpuh dua, tiga hari agi,” ku iya.
Sama bisi datai iya nya Menteri Pengintu Pengelantang Komuniti, Orang Indu enggau Pemansang Nembiak Mit Dato Sri Fatimah Abdullah, Menteri Kaunsil Kandang Menua enggau Pengawa Berumah, Dato Sri Dr Sim Kui Hian, Menteri Muda Pekara Korporat enggau Unit Komunikasyen Mensia Mayuh Sarawak Abdullah Saidol sereta Sekretari Perintah Nengeri, Datuk Amar Jaul Samion.
Kami deka bekerejasama enggau KPDNHEP Sarawak dikena nentuka tetiap ‘point of sales’ tu bisi bekal barang pemakai ke chukup reti nya peranak menua pesisir bisi endur bebelika barang pemakai. Tu udah pan digaga lalu deka terus dipejalaika.
Datuk Amar Awang Tengah Ali Hassan