Pesereta kus ngaga produk bukai ari ikan diperansang ngemeranka pengawa dagang
BETONG: Bisi 80 iku pesereta kus ngaga produk bukai ari ikan diperansang ngemeran pengawa dagang ngambika ulih mantu nyungkakka agi ekonomi tauka penatai pemisi ruang bilik.
Sekretari Politik ngagai Kepala Menteri, Dr Richard Rapu amat ngarapka penemu tauka pengelandik dagang ke dipelajar dikemeran sereta dikemeratka dikena nambahka penatai pemisi ruang bilik.
Ku iya Opis Betanam Betupi patut ulih terus mantu peranak rumah panjai baka bekunsi penemu enggau pengelandik nengah pengawa ngatur kus.
“Aku ngarapka pesereta tu ulih ngena penemu ke dipelajar tauka diulih dalam kus tu, ulih nambahka agi belanja tauka penetai pemisi.
“Kitai minta sereta ngarapka Opis Betanam Betupi ulih terus ngiring enggau ngajar sida tu ngambika ulih ngereja pengawa tu nyadi ke dagang,” ku iya.
Dr Richard mansutka pekara nya lebuh bejaku ba pengawa nutup kus ngaga salai ikan, kasam ikan enggau kerupuk lekor ti diatur Opis Betanam Betupi ba rumah panjai Penom, Paku ditu, ensanus.
Iya ngarika Sapit Kepala Menteri ti mega Menteri Betanam Betupi Moden, Tanah Adat enggau Pemansang Kandang Menua, Datuk Amar Douglas Uggal Embas.
Kus dua hari nya dipasuk urung 80 iku nyengkaum peranak ari rumah panjai Tanjung Baru, Kerangan Pinggai, Jitu, Samu, Jukun, Spuna, Ng. Bong, Danau, Senunuk, Penom, Lubok Kelampu enggau Nanga Paun.
Batang tuju kus iya nya meri awak ngagai pesereta belajar ngaga kasam ikan, ikan salai enggau kerupuk ikan nengah chara ti betul sereta ngemeranka chara ti beresi enggau selamat diempa.
Nambahka nya, objektif kus nya mega bekunsi tauka belajarka chara ngemayuhka produk bukai ngena ikan sungai, kelimpah ngiring pesereta nuju ngagai pengawa dagang.
Asil ari kus nya, dikearapka pesereta kus ulih ngangkatka tauka nambahka penatai pemisi ruang bilik.