KPM diansak nambahka kuota pengajar subjek jaku Iban
Penyampau pengajar subjek jaku Iban diatu ditemu kurang lalu penanggul nya patut diputarka KPM enggau lengkas, ku Jugah
MIRI: Kaban Parlimen Lubok Antu Jugah Muyang ngansak Opis Menteri Pelajar (KPM) nambahka kuota pengajar jaku Iban ke diatu.
Jugah ti nadai nyebut penyampau kuota nya madah, endang bisi kurang pengajar jaku Iban di nengeri tu diatu.
Ku iya, Opis Menteri Pelajar (KPM) patut meri pemerat ngagai pengurang penyampau pengajar jaku Iban laban jaku nya udah diaku ba renggat ke tinggi dalam silibus pelajar di men ua tu.
“Aku deka ngansak Opis Menteri Pelajar (KPM) nambahka penyampau kuota pengajar jaku Iban ngambika setipak enggau status ke udah diaku.
“Aku mega meransang bala pengajar di Sarawak ngambika dilatih enggau chukup sereta ngambi subjek jaku Iban ba palan pematih pengajar ke bisi diatu,” ku iya madah ba sebengkah penerang kemari.
Ku Jugah, sekula di Sarawak ditemu suntuk pengajar jaku Iban enti dibandingka enggau
“
Aku deka ngansak Opis Menteri Pelajar (KPM) nambahka penyampau kuota pengajar jaku Iban ngambika setipak
” enggau status ke udah diaku.
Jugah Muyang
Kaban Parlimen Lubok Antu
subjek bukai.
Di Sarawak, sepenyampau 2,240 iku pengajar jaku Iban deka diguna, sebedau penyampau nya majak kurang agi enti ketegal pinchin dalam timpuh dua taun ke deka datai, ku iya.
“Penyuntuk penyampau tubuh ba subjek jaku Iban deka nyadi penanggul ke kritikal dalam pelajar enti enda diputar Opis Mentri Pelajar enggau manah. Pengirau ati sentang pekara tu mega kala dibantaika presiden Gerempung Pengajar Bumiputera Sarawak ( KGBS), Ahmad Malie dalam penerang iya kena bulan September tau siti nyin tadi,” ku iya.
Penyuntuk penyampau tubuh tu besai amat reti sereta patut diputarka enggau lengkas, ku iya.
“Nyema penanggul tu enda diputar,kami irauka nya deka nanggul pengawa nambahka pengelandik nembiak rebak nguasa jaku Iban ti ngujungka jaku nya punas ila,” ku iya.
Dikena mutarka penanggul nya, Jugah mantaika langgur penemu ngambika Opis Menteri Pelajar ngambi baru pengajar jaku Iban ke udah pinchin ungkup sementara dikena mutarka pengurang penyampau tubuh ngajar subjek nya, sereta lalu nyadi staf sukung ngagai bala pengajar ke bisi diatu.
“Sida tu bisi peneleba enggau pengelandik, sida bis ngulu kus, worksyop enggau pengawa meri penerang sentang subjek Iban ke diatur Opis Menteri Pelajar.
“Pengajar Iban ke udah pinchin mesti dikangau ngajar subjek nya baru bepelasarka ripot pengerai sida ari pemesa perubat dikena nentuka sida ulih meri servis ke pemadu manah,” ku iya.