Pengeran Dr Mazlee deka ngemanah sekula repuk di Sarawak diterima manah

KUCHING: Raban Nembiak Gabungan Parti Sarawak (GPS) nyambut chara positif perambu ari Menteri Pelajar, Dr Maszlee Malik ti keran deka ngemanah, ngaga baru tauka ngangkatka sekula repuk ba Sarawak.

Sida mega berasai temegah meda Maszlee udah mantaika peneka gawa begulai enggau Perintah Sarawak pasal pekara nya.

Maszlee mansutka jaku nya berindik ari penemuai iya ngagai dua buah sekula primari di Bintulu, ke alai iya madah, ngingatka iya ngagai sekula ba menua asal iya ba Skudai Kiri di Johor Bahru dalam taun 1970 enggau 1980.

Taja pia, Raban Nembiak GPS geli ati lebuh Maszlee madah iya deka ke Sarawak kurang agi bepolitik laban penerang ari iya mega bisi bekaul politik, ti nyalahka Perintah Sarawak datai ba pekara ke sama.

Raban nembiak mega beratika tu bisi bechiping enggau enda manding ngagai Maszlee besemaka Sarawak enggau menua asal iya ba Johor lebuh bepelasarka ubah pemansang 40 taun ke udah.

Kebuah pia, pemesai nengeri Sarawak nyau sebaka pemesai menua Semenanjung Malaysia lalu menua asal Maszlee jauh mit, pia ku Raban Nembiak GPS ba penerang begulai ti disain Chairman Pampang Nembiak ari Parti Pesaka Bumiputera Bersatu (PBB), Parti Rakyat Sarawak (PRS), Parti Sa’Ati Rayat Sarawak ( SUPP) enggau Parti Demokratik Progresif (PDP).

Sida madahka Maszlee kelalu lurus ti ngujungka iya enda nemua kebuah penusah ditapi peranak Sarawak ketegal ‘Malayan Imperalists’.

Sida mega ngingatka Maszlee pasal pekara bekaul enggau pelajar ari baruh bidang kuasa perintah besai lalu ukai Perintah Sarawak.

Iya mega diingkatka pekara taja Menteri Besai ke diatu, Tun Dr Mahathir Mohammad ti nyadi Presiden Parti Pribumi Bersatu Malaysia (Bersatu) iya nya Menteri Pelajar berengkah ari taun 1974 ngagai 1978.

Ke bendar semua ketuai besai ba Pakatan Harapan ke diatu kala nyadi Menteri Pelajar, Presiden Parti Keadilan Rakyat (PKR) enggau ke ditaga nyadi Menteri Besai ila, Datuk Seri Anwar Ibrahim (1986-1991), Sapit Presiden Bersatu Tan Sri Muhyiddin Yassin (20092013 enggau 2013-2015).

“Patut diatu badu agi besalah enti semua deka mansang ke mua mutarka isu sekula repuk ba Sarawak. Sekula nyadi pelasar nempa bala ketuai menuda jemah. Laban semua sekula repuk beumur antara 30 ngagai 40 taun, diatu udah datai ba timpuh iya digaga baru tauka diangkat manah.

“Isu tu patut anang dibalut ngena politik. Maya Perintah Sarawak mantaika juluk deka mutarka isu tu, bala ketuai nengeri ukai malut politik tang semina deka meda semua tu digaga baru tauka diangkat manah pulaika pemansang pelajar ba nengeri tu,” ku penerang nya.

“Enti Perintah Besai deka meda Sarawak bisi autonomi kelebih agi ba pemansang pelajar sekula, sida mesti mulaika hak ngagai nengeri tu ngempu minyak enggau gis ba kandang tasik Sarawak, semua iya.”

Ngambika Maszlee nemu, perintah Barisan Nasional (BN) sebedau tu udah ngemendarka RM2.5 bilion dikena nyeleti enggau ngangkatmanahka sekula repuk dalam taun 2018 enggau 2019 – udah dibagi, penyampau RM1 bilion ungkup Sarawak, RM1 bilion ungkup Sabah lalu RM500 juta ungkup Semenanjung Malaysia, ku Raban Nembiak GPS.

Sebedau Pengawa Bepilih Besai 2018 tu tadi, perintah BN sebedau tu udah ngagihka RM419.05 juta dikena nyeleti enggau ngaga baru sekula repuk ba Sarawak.

Sepenyampau 50 buah sekula udah digaga Opis Kereja Raya (JKR) beungkus RM138.45 juta seraya 66 buah sekula agi digaga Opis Menteri Pelajar ti beungkus RM280.6 juta.

Bisi 17 buah sekula repuk bukai agi bedau tembu digaga.

Laluh RM581 juta agih belanja nya deka dibai ngagai taun 2019.

Taja belanja besai tu diagih ari perintah BN sebedau tu, Perintah Besai Pakatan Harapan ( PH) ke diatu semina ngagihka RM100 juta ungkup semua menua, ku Raban Nembiak GPS, bechiping amat Perintah Besai PH ba pengawa ngagihka belanja ungkup pemansang pelajar.

GPS ditumbuh pengudah semua empat komponen BN Sarawak ningkilka diri ari gempung BN beberapa bulan pengudah Pengawa Bepilih Parlimen 9 Mei 2018.