RM315 juta ari Bajet Sarawak 2019 nyungkak pemansang pengawa betanam betupi
SIBU: Ungkup RM315 juta ari Bajet Sarawak 2019 ngagai pemansang pengawa betanam betupi dikeandal ngubah singkang pengawa nya ngagai tikas ti manah agi ba menua pesisir.
Presiden Sarawak Workers Party ( SWP) Munan Laja madahka bajet serak tu keterubah iya pemadu mayuh bela ngemeratka pengidup rayat di rumah panjai.
“SWP siti parti menua pesisir nyukung amat bajet nengeri tu.
“Tu mai berita manah ngagai rayat rumah panjai ti ngemeranka pengawa betanam betupi,” pia ku iya madah maya mantai penemu sentang Bajet Sarawak 2019, kemari.
Munan madah, ari penyampau ungkup ngagai pengawa betanam betupi nya, iya ngarapka perintah tau ngaga jalai ngelawa kebun orang rumah panjai.
“Enti bisi digagaka jalai ti meruan ngelawa kebun dia rayat deka muntang agi ngemansangka tanah sida alai betanam betupi.
“Ari projek baka tu, penatai pemisi peranak menua pesisir tauka rumah panjai bela ulih disungkakka agi,” ku iya madah baru.
Kelimpah ari nya, Munan mega madahka parti sida berasai lantang ati laban pengawa nyukat tanah adat Bumiputera bela diungkupka belanja.
“Nambahka nya, ba kitai, udah maya iya mega nengah bajet tu alai tanah NCR ke udah disukat ba inisiatif nyukat kelingi beberapa taun ke udah deka disukat baru nengah Seksyen 18,” pia ku iya madah.
Ensana, Kepala Menteri Datuk Patinggi Abang Johari Tun Openg nibak sejarah nengeri tu alai ngungkupka RM11.914 bilion ba Bajet Sarawak 2019.
Penyampau tu dibagi ngagai RM9.073 bilion ungkup program pemansang enggau RM2.841 bilion ba belanja operasyen.
Tebal agi raban politik ba nengeri tu madahka pengelantang ati meda penyampau bajet ti pemadu besai digaga nyentuk ke diatu kelimpah macham penemu mega dibantai rayat nengah laman rama.
Pia mega, pengari rayat ari Gabungan Parti Sarawak (GPS) kemari arap bendar semua perambu ba bajet tu deka dipenyadika berengkah taun ti deka datai.