Mosyen disukung 31 iku ADUN ti enggau bejuraika nya nyengkaum raban ari ADUN ari Pakatan Harapan (PH)
KUCHING: Kunsil Nengeri (DUN) kemari ngemendarka mosyen numbuhka Komiti Konsultatif Sempekat Malaysia 1963 (MA63) ti dipasuk Kaban Kunsil Nengeri (ADUN) ari semua parti politik.
Speaker DUN Datuk Amar Mohd Asfia Awang Nassar madahka mosyen nya dikemendarka pengudah bulih sukung majoriti Kaban Kunsil Nengeri.
Mosyen nya dibantaika Menteri Dagang Temuai, Seni, Main Asal, Nembiak enggau Lumba enggau Main, Datuk Abdul Karim Rah- man Hamzah lalu disukung Menteri Muda Ba Opis Kepala Menteri (Pekara korporat) Abdullah Saidol maya baum ba hari kedua Aum DUN Ke2 Penggal Ke-3 ba Begunan DUN ditu.
Bisi 31 iku ADUN ti ngambi bagi ba pengawa jurai nya nyukung mosyen nyengkaum ari Pakatan Harapan baka ADUN Ba’kelalan, Kota Sentosa, Pelawan sereta Krian.
“Nengah sukung semua, aku netapka mosyen ti dibantaika Menteri Dagang Temuai, Seni, Main Asal, Nembiak enggau Lumba enggau Main ti mega ADUN Asajaya, dikemendarka”ku Asfia lebuh ke macha pemutus nya.
Dulu ari nya, Karim dalam mosyen nya madahka Komiti Konsultatif ditumbuhka dikena nentu sereta setuju enggau pengari Sarawak dalam komiti ti ngenataika pemerat, hak enggau penuduk Sarawak baka ke ditulis dalam MA63 enggau Konstitusyen Perintah Besai.
Ku iya, kena 5 Septmber 2018, kabinet perintah besai udah ngaga pemutus numbuhka komiti pemandu (steering committee) (MA63) ti mungkur 16 iku kaban ti bechairmanka Menteri Besai sereta diarika 11 iku kaban pengari ari perintah besai, ke alai semina dua pengari ti ngarika Sabah enggau Sarawak.
Beduduk ari komposisyen nya nyata amat ku iya, Kepala Menteri bisi Menteri Besai minta komposisyen nya diserenih baru ti ngambi ngira status kaban kunsi ti sama maya numbuhka Malaysia.
Ungkup langgur ku iya, ngambi beteladanka model komiti Komiti Perintah (IGC).
Abdul Karim bejaku baru madahka penumbuh Komiti Konsultatif nya dikena nyang- gup pelaba rayat Sarawak dalam autonomi ke besai agi enggau nurunka kuasa nengeri.
Nambahka nya, Abdul Karim madahka penumbuh komiti nya nitihka Perintah tetap 89 begulai enggau Artikel 24 (1) Konstitusyen Nengeri ke alai komiti diarika pengari semua parti politik ba DUN.
Langgur komiti nya ditumbuh dikena betemu sereta ngulih jaku setuju enggau pengari ti dikenataika pengari Sarawak ngagai Komiti MA63, kedua, dikena nentuka pengari nya senipak enggau juluk ngemaju enggau nyaga pemerat, hak enggau penuduk Sarawak baka ditulis dalam MA63 enggau Konstitusyen Perintah Besai.
“Entara kaban Komiti Konsultatif (MA63 ti dilanggur iya nya Datuk Amar Asfia Awang Nassar ti nyadi Chairman; Datuk Abdul Karim Rahman Hamzah; Dato sri Wong Soon Koh; Sharifah Hasidah Sayeed Aman Ghazali; Abdullah Saidol; Datuk Snowdan Lawan; Datuk Idris Buang; Datuk Sebastian Ting; Dato Henry Harry Jinep; See Chee how enggau Irene chang,” ku iya seraya madahka pekara bekaul enggau MA63.
Kelimpah ari nya, Abdullah lebuh ke nyadi penyukung sereta bejuraika pekara nya madah sekeda ari parti ti merintah ba perintah besai diatu madahka isu komposisyen enda beguna lalu sereta nuduh Kepala Menteri ti nyadi pemesai Sarawak dalam Komiti nya, takut.
“Tu ukai isu takut tauka enda, tang tu pasal prinsip... kitai dekaka batang struktur platform berunding nya enda tau enda baka IGC sebedau tu.
“Enti pelasar penuduk baka tu dipebasaka Perintah Besai PH, aku nadai meda sida ulih bebasaka pekara ti berat ari tu,” ku iya ti nyukung mosyen ke dibantaika Abdul Karim nya.
Berebak enggau ku Abdullah bepenemu mosyen numbuhka Komiti Konsultatif patut disukung enggau majoriti tetiap iku ADUN dalam DUN.
“YAB Kepala Menteri Abang Johari ke nyadi pengari kitai rayat Sarawak dalam Komiti Pemandu ( Steering Committee) ba renggat perintah besai ukai semina ketegal iya Kepala Menteri Sarawak tang kitai dekaka penuduk iya ditegap sereta disukung Komiti Konsultatif renggat DUN ti nyadi kelai penuduk pengari kitai ba mija berunding enggau perintah besai ila, iya nya ngarika sada, ati enggau kedap seput Anak Sarawak,” ku iya.
Datuk Amar Mohd Asfia Awang Nassar Speaker DUN