MITI deka ngerundingka chara mutarka pengawa dagang di Sarawak
MIRI: Sarawak ukai semina tinggal, tang mega enda disebut dalam randau bekaul pemansang pengawa dagang sereta dagang mit enggau tengan pemesai (PKS) ungkup timpuh ti panjai.
Beserimbai enggau nya, Opis Menteri Dagang Antarabansa enggau Industri (MITI) ti sedarka pengurang tu deka terus ngerundingka jalai dikena mutar pekara bekaul guna sereta peluang ungkup pengawa dagang enggau ejensi ti bekaul di nengeri tu, kelebih agi di Sibu enggau Miri.
Sapit Menteri Dagang Antarabansa enggau Industri Dr Ong Kian Ming madahka iya tetap berunding positif PKS di Sarawak ngembuan lebih mayuh ruang dikena terus ngerembai.
Berindik ari nya, opis menteri nya deka nambahka bantu, nyengkaum meri penemu ba renggat tumu ungkup bala nembiak, ngaul diri dalam bidang PKS lalu mega deka nyaup ngiga palan industri ti bekaul enggau kayu di Sibu.
“Kitai di renggat opis menteri, deka nyidi pekara ti diguna industri ditu enggau manah agi lalu ninga pekara ti ditapi PKS lalu ngiga idea baru mantu sida ngerembai enggau eksport produk PKS,” ku iya.
Iya bejaku munyi nya ba aum media di Miri bedau lama, iya nya palan kepenudi penemuai kereja iya begulai enggau pemesai MITI, Kaunsil Pemansang Penanam Puku Malaysia (MIDA), Opis Pemansang Pengawa Dagang Luar Malaysia (MATRADE) enggau Malaysia Industrial Davelpment Finance Berhad (MIDF) ke Sibu, Port Bintulu, Taman Perindustrian Samalaju enggau Miri kena 8 nyentuk 10 Oktober dikena narit pengandal pedagang ari menua tu sereta pemain industri ngambika nemu eng- gau nenak agi bekaul industri sereta PKS.
Ku Ong madah, MITI deka nusun mayuh agi aktiviti dikena nyediaka pelin abru dalam ngemansangka agi PKS di Sabah enggau Sarawak.
Bekaul penemuai iya ke Port Bintulu enggau Taman Industri Samalaju (SIP), Ong madah bisi mayuh penguji ti ditapi lalu peluang dikena nambahka penyampau port sereta mutarka pekara bekaul pengurang servis di estet industri ti udah dibuka kenyau ari empat taun ti udah.
“Penguji ti ditapi tu iya nya bepun ari penumbuh kandang endur tu lalu nya mega peluang ungkup pedagang di menua tu muka servis ungkup nampung pemayuh peranak di kandang menua nya ti majak nambah ba Samalaju.
“Bisi ser is ti mimit (di kandang endur nya), sekalika klinik, bank tauka palan pemakai, tang nya udah nyadi sebuah palan endur kerejasama entara perintah besai enggau perintah nengeri ngambika ulih dikemansang,” ku iya nambah.
Bekaul pekara ke udah dipadah PKS di Miri enggau Sibu, Ong madah MITI deka mutarka serebana sida ti madahka kurang penerang bekaul inisiatif ti disediaka perintah besai.
Ku Ong madah enggau silik, penemuai iya nya mega berindik ari penemuai menteri sida ke dulu Darrel Leiking kena 21 September tu tadi, ke mega bisi madah perintah baru Pakatan Harapan (PH) deka mekuh lebih agi ngagai Sarawak enggau Sabah.
Kebuah pia, tu dikena ngaul pedagang menua tu enggau pemisi ti dikembuan MITI sereta ejensi bukai dalam bidang teknologi ke makin nambah.
Bisi 200 iku pesereta nyengkaum raban pengeksport, kaban gerempung pedagang ti udah datai ngulu program begulai engu pengari nya di Sibu enggau Miri.
Sama bisi datai maya program di Miri iya nya pengari Gempung Germpung China, Dewan Perdagangan dan In- dustri Cina Miri (MCCI), Dewan Usahawan Bumiputera Sarawak (DUBS) Pampang Miri enggau ke bukai.