Sida endang enda ditagang nyereta sebarang gerempung tang tentuka tanggungpengawa ngajar dikemerat
KUCHING: Bala pengajar kelebih agi ba nengeri tu patut pintar magi jam ngereja tanggungpengawa diri (ngajar) sereta aktiviti gerempung.
Menteri Pelajar, Sains enggau Pansik Teknologi, Dato Sri Michael Manyin Jawong madah, kebuah pia laban nangika tanggungpengawa sida ngajar ba sekula tejanggal.
Nitih ku iya, nadai sebarang tagang ngagai bala pengajar nyereta sebarang gerempung ti sah nyengkaum Gerempung Pengajar Sarawak ( STU) tang patut nentuka pangku pengawa nyadi pengajar dikemerat.
“Pengajar enda patut nempayaka tanggungpengawa sida nyadi pengajar nyeridi bala anak enggau malut pengawa gerempung.
“Sida patut meri pemerat ti patut lalu berunding baka ni deka nambahka penyulut pelajar ngambika ulih besemekih ba jeman digital kemaya hari.
“Aku pechaya ari ngereja pengawa baka tu, kitai ukai semina ngangkatka pangku pengawa nyadi pengajar tang mega ulih nempa rebak baru ti pegari,” ku iya.
Iya mansutka jaku nya rambau Pengerami Makai Lemai Aum Besai Delegasyen Dua Taun Sekali ke-24 STU ba sebuah hotel tebilang ditu, malam kemari.
Berindik ari nya, Manyin ngansak STU seruran ransing ngintu pengelantang semua kaban di baruh pegai gerempung tu enggau ngelala peminta sida.
“Nyadi kaban gerempung pengajar kemaya hari beguna amat dikena ngintu pengelantang sida ti agi gawa.
“Nya alai, aku deka nesau mayuh agi pengajar ba nengeri tu nyadi kaban ngambika gerempung seruran tegap sereta ulih nyaga pemerat sida,” ku iya.
Sida patut meri pemerat ti patut lalu berunding baka ni deka nambahka penyulut pelajar ngambika ulih besemekih ba jeman digital kemaya hari. Dato Sri Michael Manyin Jawong Menteri Pelajar, Sains enggau Pansik Teknologi
Berebak enggau nya, iya mega bisi ngagihka belanja sepenyampau RM50,000 ngagai STU dikena melanja aktiviti gerempung nya.
Sama bisi datai, Presiden STU, Jisin Nyud, Presiden Gerempung Pengajar Bumiputera Sarawak (KGBS) enggau bala pemesai bukai sereta bala kaban STU ari selampur nengeri.