Dikena nyediaka servis betikas antarabansa ti ngelantangka mensia mayuh, kelimpah nentuka pengelikun seruran dijaga
SIBU: Perintah nengeri ngemeratka pengawa deka ngemanah sereta ngemansangka terminal penyangkai nyentuk datai ba tikas antarabansa dikena nyediaka servis ti ngelantangka mensia mayuh.
Sapit Kepala Menteri Tan Sri Datuk Amar Dr James Jemut Masing madah, iya andal amat juluk ati nya deka dipenyadika nengah Opis Sungai-Sungai Sarawak (SRB) dudi hari ila.
“Terminal penyangkai betikas antarabansa ti dikemeratka kitai deka digaga tu mungkur semua pekara moden baka tikit online, kaunter ‘check-in’ beg, palan endur nganti ti manah, likun sereta ngemanahka agi sistem pejalai mensia mayuh ti bekenaka perengka pengangkut sungai.
“Nambahka nya, sistem mayar bil lama mega patut disilih ngena sistem kupun iya ke dikena mayar bayar terminal enggau bayar sangkai ba terminal ngagai perintah,” pia ku iya madah.
Iya mantaika jaku tu maya Pengerami Makai Lemai Ngintu Penumbuh Ke- 25 taun SRB di Kingwood Hotel, lemai ensana.
Terminal penyangkai betikas antarabansa ti dikemeratka kitai deka digaga tu mungkur semua pekara moden baka tikit online, kaunter ‘check-in’ beg, palan endur nganti ti manah, likun sereta ngemanahka agi sistem pejalai mensia mayuh ti bekenaka perengka pengangkut sungai. Tan Sri Datuk Amar Dr James Jemut Masing Sapit Kepala Menteri
Masing ti mega Menteri Pemansang Infrastruktur enggau Perengka Pengangkut Sarawak madah, projek pemansang pengangkut baka ngemanahka padang bilun enggau ngaga Pan Borneo dijangka enda mai mayuh ubah ngagai sistem perengka pengangkut sungai.
Kebuah pia ku iya, laban mayuh menua tauka rumah panjai endang digaga nebing sungai tauka enda kena pansa pemansang jalai alun.
“Ambika banding baka pemansang jalai ngelawa Kapit ari Sibu dipelabaka enda mayuh ngubah pejalai mensia mayuh nengah sungai laban ke mayuh diau ba nebing sungai,” ku iya madah.
Iya madah, dalam kandang sehari, urung 300 ngagai 500 buah perau enggau kapal nengah 35 bengkah sungai ba nengeri tu.
Ku iya, tu mungkur pemanjai sungai 5,000 km lalu ari pemanjai nya, 3,500 km ditengah dikena bebaika barang komersial enggau mensia mayuh antara mengeri baka Kuching, Sibu, Bintulu enggau Miri.
“Taun siti tadi penyampau mensia mayuh bekenaka perengka pengangkut sungai nambah ngagai sejuta iku ari taun ke udah tauka manggai tiga juta iku.
“Lima taun sebedau tu ngerikod penyampau dua juta iku,” pia ku iya.
Berebak enggau tu Masing mega madah, kenyau ke ditumbuh, SRB udah tampak mujur nempa transformaysen ba sistem perengka pengangkut sungai ti moden agi seririh enggau ubah dunya.
“Mayuh program nyengkaum pengawa ngemanahka sistem udah dikemujurka SRB.
“Pia mega ba pemujur neritka atur, diatu penyampau perengka pengangkut sungai mai kelalu mayuh orang tauka sarat majak kurang tauka tusah deka dipeda agi.
“Semua tu bepun ari pengeransing SRB bejalaika pengawa matau ngambika perengka pengangkut sungai semampai nitihka atur,” ku iya sambil madah pemujur tu deka nempa pengarap mensia mayuh sentang pengelikun maya betengahka sungai.
Sama bela datai maya tu iya nya Menteri Muda Perengka Pengangkut Datuk Dr Jerip Susil, Chairman SRB Dr Murni Suhaili, Sekretari Mendam Opis Pemansang Infrastruktur enggau Perengka Pengangkut Datu Safri Zainudin enggau Kontroller SRB Richard Tajan.