Ngembuan runding ti panjai, ulih bekerejasama dikena nentuka penegap tetiap gerempung
SRI AMAN: Runding ti pechaya enggau pangan diri, kerejasama, besaup enggau berunding panjai antara pekara ti mai pemujur sesebuah gempung ti nuju pemansang enggau penegap bala kaban sida, pia ku Menteri Muda Pengelantang Komuniti Sarawak, Datuk Francis Harden Hollis.
Nitih ku iya, runding bansa nya patut dikembuan bala kaban serakup kitai serata nengeri dikena nyapai pemujur sereta ngenegapka serakup nya ngambika ulih nyadi teladan ngagai serakup bukai ti udah lama bisi ba nengeri tu.
Harden ti mega Kaban Kunsil Nengeri (ADUN) Simanggang mansutka jaku tu lebuh bejaku ba pengawa Angkat Sumpah Kaban Komiti Klan Cheng Nengeri Sarawak sereta Pekit Nyanyian Renggat Nasional Klan Cheng bepalan ba Restoran Eden, Sri Aman semak ditu, malam tadi.
Ku iya, serakup tu udah bisi bepuluh taun pengelama, kitai pechaya, serakup tu udah jauh singkang, udah ngasai pemar, pait manis sereta mega ngasaika mayuh peneleba ti nyadi lalau dikena mansang ke mua.
“Kitai pechaya, semua ketuai suba ngembuan ulah deka bekerejasama, komited, ulah bebatak asur, ulah enda ngeninggika diri sereta deka gawa nyapai juluk serakup. Kitai pechaya sida mega bisi penyiru ti endang ngira diri empu aja maya dipilih mangku pengawa dalam serakup.
“Baka udah ditemu kitai, tetiap serakup bisi penempa sida empu, budaya kediri empu sereta bisi juluk sida empu. Nya kebuah, bisi asai ngira serakup ti diarika sida, bisi asai deka ngindik serakup bukai. Tang nyentuk diatu, serakup tu nyadi sebuah serakup ti tegap ngarika serakup ti bisi ungkup komuniti Bidayuh,” ku iya
Nangkan nya ku Harden, tetiap serakup tauka gempung enti deka mujur nyapai juluk enggau peneka, bala kaban begunaka ketuai ti ngembuan ulah deka gawa nadai ngira penguntung diri. Kitai semua nemu, mangku pengawa dalam komiti endang nadai nerima sebarang insentif, nadai ganti rugi, semina pengawa volunteer aja.
Enti kitai ngira penguntung diri, kitai ingatka penuduk diri, kitai ingatka basa, dudi hari enti pekara dikingin kitai enda tejapai, kitai deka besalah orang bukai. Nya kebuah kitai suah meda penyarut enggau saru penemu antara bala ketuai lalu ngujungka serakup nadai teulihka nama-nama tang sida pambar.
Nya alai iya ngelalau sida enti deka ngaul diri nyadi ketuai tetinggi serakup tauka gempung, kitai patut ingat gawaka tuju serakup lalu megai tanggungpengawa ba pangku pengawa dipangku. Bala ketuai ti nyulut, pegari nama sereta mujur ngembuan ulah ti bagas, deka bekerejasama enggau pangan diri sereta enda ngira penuduk iya empu deka nerima balas.
“Aku deka ngapil ngagai bala ketuai tetinggi serakup ngambi ngemeranka pemanah ti udah bisi. Enti kitai bisi langgur penemu, bisi saru penemu, iya patut dibai dalam aum lalu dipejurai enggau meruan sereta lantang. Ari nya, aku nemu serakup nya deka mansang enggau mujur ba semua pengawa ti dilanggur pulaika pemaik serakup enggau bala kaban sida,” ku iya.
Berebak enggau nya ku iya, tetiap serakup bisi tang- gungpengawa ba pemansang komuniti, ukai semina ungkup siti bansa aja, tang semua.
“Ambika chunto, kitai bisi pangku pengawa besai ngenegapka penyerakup enggau diri sebilik, antara bansa enggau ke bukai. Nya kebuah aku suah nyebut kaul enggau penyiru semua raban ba aktiviti penyerakup nyadi pengawa positif nuju penegap pemansang individu, diri sebilik sereta komuniti ti ulih ngemai kitai nyapai juluk Wawasan 2020,” ku iya nerang silik.
Pengawa sehari nya dirichah enggau pengawa ngangkat sumpah komiti nembiak enggau indu serakup nya ungkup penggal 2018-2019 ti dikemataka Harden.
Bisi diatur pekit karaoka lagu mandarin renggat nasional ungkup serakup nya enggau pengerami ngintu kuih bulan.