Perintah deka meresa sistem meri subsidi ungkup perengka pengangkut barang
MIRI: Perintah deka meresa baru sistem meri subsidi ungkup perengka pengangkut barang ngagai kandang menua pesisir Sarawak.
Sapit Menteri Dagang Dalam Menua, Koperasi enggau Orang Bebelika Barang (KPDNKK), Chong Chieng Jen madahka pengawa tu dipejalai dikena nentuka pengawa meri subsidi nya digaga nitihka pematut meri pemaik ngagai peranak ba kandang menua pesisir.
“Kitai enda ngenggaika, bisi mayuh pengawa ti enda lurus nyadi dalam skim subsidi ti dipejalaika (perintah) sebedau tu, nya kebuah aku deka mai pekara tu ngagai Menteri (KPDNKK) ngambi berandau sereta ngarapka iya deka diperesa baru pulaika pemaik rayat,” ku iya.
“Kitai dekaka siti sistem baru ti manah agi senggau sikar agi sereta ngambika kitai ulih matau gaya pekara nyadi ba kandang menua pesisir enggau enda ibuh ngaul ‘penamaan kakitangan’ sereta opis menteri nya,” ku iya nambah.
Bejaku ngagai pengarang berita pengudah ngatur pejalai ngelawa siti ari kedai dagang tebilang ditu kemari, ku Chong, pengawa meresa baru nya ila deka mungkur bemacham pekara nyengkaum gaya rampa menua ba menua pesisir nengeri tu.
Ku Chong, dikena opis menteri nya nukar siti sistem lama (ti bisi diatu) ukai pekara muntang laban iya patut ngaul pansik enggau bala staf sereta pemesai ba bemacham renggat, peranak menua nya enggau ke bukai, nyengkaum penuduk gaya menua ba menua pesisir nengeri tu, sekeda POS nya lebih 100 km penyauh ngagai menua ulu.
Ba lansa sama, Chong madahka pengawa enda lurus nyadi dalam sistem ti bisi diatu ketegal kurang staf gawa matau lebih 1,600 buah endur ‘point of sales’ (POS) ba menua ulu nengeri tu.
“Enti kitai deka nambah staf gawa ti chukup matau POS tu, deka melanja bepuluh ribu, tang ungkus semina RM1000 aja, nya alai enda ulih diterima akal.
“Nya alai kitai begunaka siti sistem ti pemadu manah dikena mutarka penanggul tu,” ku iya nambah.
Dulu ari nya, iya sekali agi meri pengandal ngagai rayat, ke alai chukai servis enggau jualan (SST) ti dipejalaika baru dikena nyilih cukai barangan (GST) manah agi lalu pangka ba barang kurang dibida GST.
“Aku deka nyimpul, di baruh GST, rayat mayar RM43 biliun, tang di baruh SST, kitai melabaka rayat semina mayar RM24 biliun aja, tau mantu kitai meransang ekonomi enggau pemansang menua,” ku iya nambah.
Sama bisi nyempulang Chong kemari iya nya Senator Alan Ling; ADUN Pujut, Dr Ting Tiong Choon, Sapit Direktor KPDNKK Sarawak, Md Nawawi Ab Rahman sereta Menijar Nam Leong Sarawak, Khor Whye Pheng.
Nitih ku Khor, Pasaraya Nam Leong ti ngembuan lebih 20 pampang ba serata nengeri, bisi lapan pampang di Miri nyengkaum bela siti ba Pasar Niah enggau Bekenu.