UNIMAS deka terus bejalaika pengawa mansik enggau pelajar
KUCHING: Universiti Malaysia Sarawak (UNIMAS) terus bejalaika batang pengawa ba pengawa mansik enggau pelajar dikena nyaup pemansang menua, pia ku Mandal Cancelor UNIMAS, Prof Datuk Dr Mohamad Kadim Suaidi.
“UNIMAS bejalaika batang pengawa mai mayuh bengkah pengemeran industri enggau organisasyen ba pengawa ngemansangka teknologi enggau mansik ti nguntungka raban bansa.
“Ba penemu aku, aku pechaya UNIMAS deka terus bejalaika batang pengawa besai ba pengawa mansik enggau pelajar ungkup Sarawak.
“Universiti tu udah mantu sereta enda ngetu nyaup ba pengawa pemansang nengeri,” ku iya ba jaku pengelalu International UNIMAS STEM Engineering Conference (EnCon) 2018, ditu.
EnCon 2018 ti berambai jaku ‘ Realizing The 4th Industrial Revolution nIn engineering And Built Environment’ ke diatur UNIMAS dua hari berunggu ba sebuah hotel, mujur dipenyadika Kepala Menteri Datuk Patinggi Abang Johari Tun Openg, kemari.
Bejaku baru Kadim madah, Fakulti Injiniring udah chakah bejalaika pengawa ngetanka kualiti enggau standard ti diaku Engineering Accreditation Council (EAC).
Dalam pengawa ngerembaika langgur sereta program ke benung dipejalaika ku iya, apin lama Meng dalam Mekanikal Injiniring nengah kus ti dikemendarka Opis Menteri Pelajar, senipak enggau visyen sereta misyen fakulti.
“Fakulti mega chakah ngiga chara ngemanahka penegap pengawa Mansik enggau Ngemansang (R&D).
“Fakulti mega seruran netapka tatak baru, standard enggau juluk tauka tagit dalam pengawa ngulihka geran dikena mansik enggau belanja sereta kerejasama enggau industri.
“Nya dikena ngangkatka pemanah makmal endur mansik enggau kereban dalam langkar enggau inovasyen produk,” ku iya.
Berindik ari pekara nya, nyerumba EnCon 2018, UNIMAS nengah Fakulti Injiniring nempa kerejasama enggau pengemeran industri nengah 12 sempekat kerejasama ti nyengkaum lima Sempekat Memorandum (MOA) enggau tujuh Memorandum Pemereti Ati (MOU).
Kerejasama nengah MOA disain UNIMAS enggau Construction Research Institute of malaysia (CREAM); CMS Cement Industries Sdn Bhd; Universiti Kebangsaan Malaysia (UKM); University of Limoges, Franve enggau Universiti Sains Malaysia (USM), lalu kerejasama MOU, fakulti betukar enggau Opis Mineral enggau Geosains Malaysia (JMG); Press Metal Bintulu Sdn Bhd; Samalaju Downstream Sdn Bhd; HT Energy (S) Sdn Bhd; Malaysia Research & Innovation Society (MyRIS); Kanp University of Science and Technology, Wudil, Nigeria (KUST)enggau University of Kracheh, Combodia (UKC).
Kelimpah ari nya,lebuh ti ngenang pasal EnCon 2018, Kadim beterima kasih ngagai piak ke sama enggau bekerejasama ngemujurka objektif aum besai nya baka Opis Menteri Pelajar; Opis Menteri Pelajar, Sains enggau Pemansik Teknologi Sarawak sereta Opis Pelajar Nengeri Sarawak.
“Taun tu EnCon nyendiaka pelasar endur raban profesional dalam bidang Sains, teknologi enggau injiniring nempa kaul enggau kerejasama.
“Aum besai tu nyendiaka kandang endur khas alai berandauka pekara berat dikena nambahka penemu ba pengawa ngangkatka sains enggau injiniring kelebih agi ba Sarawak,” ku iya.