Perambu nganti IPG Miri ngagai palan TVET nyangka deka diteruska: Lukanisman
MIRI: Perintah ke diatu nyangka deka nampung langgur penemu perintah sebedau tu ti deka nukar status Palan Pematih Pengajar (IPG) Kampus Sarawak, Miri ngagai politeknik tauka Palan Pelajar Teknikal enggau Latih Vokasional (TVET), ku Lukanisman Awang Sauni.
Taja pia ku Kaban Parlimen (MP) Sibuti nya, Opis Menteri Pelajar Malaysia (KPM) sedia nerima langgur penemu ari mayuh bengkah raban lalu sedia nyerenih baru isu nya enti bisi pekara bukai ke pemadu baru.
Iya dipinta ngelansa pasal timbal Sapit Menteri Pelajar Teo Nie Ching ngagai Senator Alan Ling Sie Kiong di Dewan Negara apin lama ke udah. Ku iya, rambau aum De- wan Rakyat tu tadi, opis menteri tetap setujuka pemutus kabinet sebedau tu diputus kena 24 Mei 2017 nukar status semilan IPG belalauka pemutus ari pansik ti udah dipejalai.
“Aku udah mantaika tanya ngagai parlimen lebuhka baum apin lama ke udah lalu saut sida iya nya perintah deka nampung pengawa nutup IPG lalu nukar status ngagai palan TVET ke alai aku udah madahka penemu diri enggau mantaika isu ti sama ba ‘perbahasan titah diraja’.
“Aku mantaika kebuah IPG patut ditan ba Utara Sarawak dikena nangkup peminta pengajar pelatih adap Utara baka Bintulu, Baram, Miri, Limbang enggau Lawas kelimpah nentuka kuota 90: 10 pengajar menua tu ulih dijapai,” ku iya lebuhka dirandau Utusan Borneo.
Pia mega ku Lukanisman, ba simpul aum Menteri Pelajar Dr Maszlee Malik, iya bisi madahka pengawa nutup IPG enda deka mangka penyampau tubuh pengajar laban tebal agi nembiak rindu agi ngulihka Sarjana Muda Pendidikan ba palan pelajar tinggi menua tu.
“Dr Maszlee madahka penyampau tubuh enda entu mayuh tama IPG enggau pemerat diberi tama ngagai Universiti Perintah ( UA) antara kebuah pemutus ngubah status IPG ngagai palan TVET,” ku iya.