Pengari rayat GPS dipinta matau projek pemansang di menua pesisir
KUCHING: Kepala Menteri Datuk Patinggi Abang Johari Tun Openg minta pengari rayat ari Gabungan Parti Sarawak (GPS) matau projek pemansang di menua pesisir enggau silik.
Ku iya, pekara nya berat ngambi rayat teulihka empas positif ari projek pemansang ke diatur.
“Siti parlimen nyengkaum sitak kunsil nengeri ke dibaruh kuasa parlimen bisi agih belanja ungkup pengawa pemansang ba penyampau RM30 juta ungkup timpuh 2 taun.
“Semua projek tu ungkup pemaik rayat lalu pengari rayat kitai meseti nentuka projek digaga enggau lanchar,” ku iya.
Abang Johari mansutka jaku nya ba aum pengarang berita pengudah tembu aum Ketuai Renggat Tinggi (MKT) Parti Pesaka Bumiputera (PBB) ditu, kemari.
Iya nambah, seiku pengari rayat (sitak kunsil nengeri) diberi agih belanja RM5 juta nengah Projek Ubah Menua Pesisir (RTP) setaun.
“Enti bisi dua iku pengari rayat dalam siti parlimen, penyampau agih belanja RTP ungkup seduai dalam timpuh dua taun iya nya RM20 juta.
“Kaban parlimen bisi mega RM10 juta ungkup dua taun, reti nya siti parlimen bisi RM30 juta ke tau dikena ungkup projek pemansang,” ku Abang Johari.
Ngenang kaul ke sama, iya madah manifesto ke udah disemaya rambau pengawa bepilih besai ke udah deka digaga lalu dikemujur.
Kelimpah bejuraika sentang projek pemansang di menua pesisir, aum kemari mega bejuraika sentang pekara ke udah dikemendar rambau Aum Dewan Undangan Nengeri (DUN) ke diatur ba bulan Julai tu tadi.
Entara sekeda ku Abang Johari iya nya ba sentang ubah ba Kod Tanah enggau Ordinan Ngelombong Minyak 1958 (OMO58) ke bekait enggau hak ngeluarka lisin ba pengawa minyak enggau gis.
Ubah ba proses nerima kaban baru dalam PBB bisi mega dkerandau ke alai MKT bisi kuasa ngaga pemutus, tandu Abang Johari ke mega presiden PBB.
Bela ngulu aum Sapit Presiden PBB Datuk Amar Awang Tengah Ali Hassan, Sekretari Besai PBB Datuk Alexander Nanta Linggi enggau orang bukai.